आकाशको करिअर जोडिएको ‘हिँड्दा हिँड्दै’को ट्रेलर कस्तो छ ?

भदौको १ गतेबाट रिलिज हुन लागेको फिल्म ‘हिँड्दा हिँड्दै’को ट्रेलर मंगलबार सार्वजनिक भयो । प्रेम, विछोड र मित्रताको कथाम निर्माण भएको फिल्म ३ पात्रको वरिपरी घुमेको छ । जसमा नायकद्धय आकाश श्रेष्ठ र सलोन बस्नेत र नव–कलाकार रेखा शाह छन् । आकाश र रेखाको प्रेम, सलोनसँगको मित्रताको कथामा फिल्म बगेको ट्रेलरबाट वुझ्न सकिन्छ । 

यो फिल्मपछि लाइनअपमा आकाशका कुनै पनि फिल्म छैनन् । यसैले, पनि आकाशका लागि यो फिल्म महत्वपूर्ण छ । यो फिल्मको व्यापार पनि सुखद भएन भने आकाशलाई फिल्मी करिअरमा गाह्रो पर्न सक्छ । 

नारायण सुशिल पंगेनी इन्टरटेन्मेन्ट प्रालिको ब्यानरमा निर्माण भएको यो फिल्मलाई मिलन आले मगरले निर्देशन गरेका हुन् । फिल्ममा विमल श्रेष्ठको प्रस्तुति, राज लामाको निर्माण, सुशिल पंगेनीको लेखन, प्रमोद कुमार तामाङ र महादेव शाहको सह–लगानी छ । 

यो फिल्ममा सानिया खान, विशाल श्रेष्ठ, विकास थापामगर, विमल श्रेष्ठको पनि अभिनय हेर्न सकिन्छ । सुमन कुमार तण्डुकारको छायांकन रहेको यो फिल्ममा कविराज गहतराज र सुरेन्द्र बसेलको कोरियोग्राफी, गौतमराज खड्काको सम्पादन, किरण माइकल र ताराप्रकाश लिम्बुको संगीत छ ।