बल्ल बेनिशा हमाललाई फिल्म क्षेत्रले न्याय गर्दैछ

नायिका बेनिशा हमालले फिल्म ‘स्वर’बाट डेब्यू गरेकी हुन् । यो फिल्ममा उनीसँगै नायिका केकी अधिकारी र रीमा विश्वकर्माले पनि डेब्यू गरेका थिए । 

तर, आजको दिनसम्म आइपुग्दा केकी अधिकारी फिल्म क्षेत्रको सर्वाधिक चर्चित नायिका बनिन् । रीमा विश्वकर्माको करिअर फिल्ममा खासै चम्किएन । बरु, उनी कार्यक्रम होस्टको रुपमा रियालिटी शोमा चम्किरहेकी छिन् । अनी बेनिशा ?

बेनिशा हमालले यो बिचमा थुप्रै संघर्ष गरिन् । उनलाई फिल्म बनाउने मेकरले पत्याएनन् । यो बिचमा उनले ‘झ्यानाकुटी, ब्लाइन्ड रक्स’ जस्ता फिल्ममा काम गरिन् । ‘ब्लाइन्ड रक्स’बाट ‘राष्ट्रिय चलचित्र पुरस्कार’ पनि जितिन् । तर, पनि फिल्म क्षेत्र उनीमाथि कठोर नै देखियो । 

सफलता हात नपरेपछि मुम्बई गएर फिल्मी कोर्ष गर्ने सोच उनमा आयो । तर, लकडाउनले यसलाई पनि पुरा गर्न दिएन । गतबर्ष बेनिशाको हातमा २ वटा फिल्म पर्यो, ‘प्रेमगञ्ज र छक्का पन्जा ४’ । दुबै फिल्मबाट बेनिशाले प्रशंसा पाइन् । अझ, ‘प्रेमगञ्ज’ले उनको अभिनयलाई छताछुल्ल बनाइदियो । ‘छक्का पन्जा ४’ले उनको करिअरमा ब्लकबस्टरको खडेरी पनि पुरा गरिदियो । 

यी दुई फिल्मपछि बेनिशा फिल्म क्षेत्र नोटिस भइन् । आज, उनको हातमा फिल्मको अभाव छैन । एकपछि अर्को फिल्मको अफर स्विकार गर्दै अगाडि बढेकी बेनिशालाई सायद अब पछि फर्किएर हेर्नुपर्ने छैन । बेनिशाले फिल्म ‘हात्तीछाप’मा काम गरिसकेकी छिन् । उनको हातमा फिल्म ‘कोतपर्व’ परिसकेको छ । रेखा थापा र पूजा शर्माको मुख्य भूमिका रहने फिल्म ‘उपहार’मा बेनिशाको प्रवेश भैसकेको छ । ज्ञानेन्द्र देउजा जस्ता सफल निर्देशकसँग उनी काम गर्दैछिन् । 

उनको हातमा फिल्म ‘बिजुली र सिटामोल’ पनि छ । यी दुबै फिल्मको छायांकन कहिलेबाट सुरु हुन्छ पक्का छैन । मेकरको नजरमा बेनिशा परेकी छिन् । अझ, सोझो भाषमा भन्नुपर्दा बेनिशालाई फिल्म क्षेत्रले बल्ल न्याय गर्दैछ । 
बेनिशा आफ्नो व्यस्तता देखेर खुशी छिन् । साथै, चुनौती थपिएको महशुश पनि गर्दैछिन् । नेपालका नाम चलेका मेकरदेखि निर्देशकको नजर उनमा परेको छ । अब भने फिल्म क्षेत्रमा बेनिशाको भाग्य खुलेको आभाष भैरहेको छ ।