‘उपहार’मा पूजाको जोडी ‘मिस्टर नेपाल’ समर्पण

ज्ञानेन्द्र देउजाको निर्देशनमा तयार हुन लागेको फिल्म ‘उपहार’को छायांकन भदौबाट सुरु हुँदैछ । यो फिल्मका लागि निर्माण टिमले कलाकारको लाइनअप पुरा गरिरहेको छ । फिल्मका लागि मुख्य २ नायक फाइनल गरिएको छ । यो फिल्ममा नायिका रेखा थापाको जोडीको रुपमा नायक मुकुन भुषाललाई फाइनल गरिएको थियो । 

अब, अर्की नायिका पूजा शर्माको जोडी पनि फाइनल गरिएको छ । फिल्ममा पूजाको जोडीको रुपमा यो बर्षका मिस्टर नेपाल विजेता समर्पण कार्कीले काम गर्ने पक्का भएको छ । 

उनी, पाइलट समेत हुन् । पाइलट पेशामा आवद्ध समर्पणले मोडलिङ हुँदै फिल्ममा यात्रा तय गर्न लागेका हुन् । उनको यो डेब्यू फिल्म हो । समर्पणको फिल्ममा कस्तो भूमिका हुनेछ भनेर निर्माणपक्षले खुलाएको छैन । 

फिल्मका लागि अब एक नायक र एक नायिका फाइनल गर्न बाँकी छ । रेखा थापाले निर्माण गर्न लागेको यो फिल्मले ३ महिलाहरुको कथा भन्नेछ । फिल्ममा अर्जुन पोखरेलको संगीत, बिष्णु कल्पितको छायांकन पक्का भैसकेको छ ।