आश्मा जोडिएपछि कस्तो बन्यो ‘हामी तिन भाई’मा कलाकारको लाइनअप ?

मधुसुदन भट्टराइको निर्देशनमा बन्न लागेको फिल्म ‘हामी तिन भाई’मा नायिका आश्मा गिरी जोडिएकी छिन् । आश्मासँग निर्माणपक्षले मंगलबार कागजी संझौता गरेको हो । म्युजिक भिडियो र केही वेव सिरिजमा चलेकी आश्मा फिल्म क्षेत्रमा भने संघर्ष गर्दैछिन् । उनै, आश्माले बलियो नाम बोकेको फिल्मसँग जोडिने मौका पाएकी छिन् । 

स्वर्गीय निर्देशक शिव रेग्मीको निर्देशनमा तयार भएको फिल्म ‘हामी तिन भाई’ले बक्स अफिसमा ब्लकबस्टरको व्यापार गरेको थियो । निर्देशक मधुसुदनले यही नामलाई सापटी लिएर फिल्म बनाउन लागेका हुन् । 

यो फिल्मको छायांकन साउनको १० गतेबाट सुरु हुँदैछ । फिल्ममा अब आश्माको साथमा विनोद न्यौपाने, कुशल बिष्ट, जाहान्वी बस्नेत, राजाराम पौडेल, रविन्द्र झा, बिष्णु सापकोटा, दीपक बिडारी लगायतका कलाकारको अभिनय रहनेछ । 

फिल्मका लागि अर्की एक नायिकाको रुपमा लक्ष्मी बर्देवालाई  निर्माणपक्षले अनुबन्धित गराएको छ । यो सँगै फिल्मको मुख्य कलाकारहरुको लाइनअप पुरा भएको छ । फिल्ममा शिवम् अधिकारीको पटकथा तथा संवाद, निर्देशक भट्टराइको कथा, शिव ढकालको छायांकन, बनिष शाहको सम्पादन, कविराज गहतराजको कोरियोग्राफी, देव महर्जनको एक्सन, एसबी सापकोटाको संगीत रहनेछ । 

फिल्ममा साजित महत्त प्रस्तुतकर्ता, विक्रम तामाङ कार्यकारी निर्माता, त्रिरत्न श्रेष्ठ निर्माता, प्रतिमा थापा पोखरेल र भक्तलाल श्रेष्ठ सह–निर्माताको रुपमा छन् ।