‘जय हो’को ‘जोमसोमको डाँडैमा’ गीतमा अर्पण, केकी, निशा, सलोन र माओत्सेको छमछमी

भदौको ८ गतेबाट रिलिजमा आउन लागेको फिल्म ‘जय हो’को पहिलो गीत सार्वजनिक गरिएको छ । सोमबार काठमाडौंमा पत्रकार सम्मेलनको आयोजना गर्दै ‘जोमसोमको डाँडैमा हिउँ खेल्न जाने की’ बोलको गीत सार्वजनिक गरिएको छ । यो गीतमा शम्भुजित बास्कोटाको शब्द तथा संगीत, सुरेश लामा र अस्मिता अधिकारीको स्वर छ ।

सार्वजनिक गीतको भिडियोमा फिल्मका मुख्य ५ कलाकारहरु अर्पण थापा, सलोन बस्नेत, केकी अधिकारी, निशा अधिकारी र माओत्से गुरुङले नृत्य गरेका छन् । टेक पौरखी राइको निर्देशनमा तयार भएको फिल्मको यो गीतको भिडियोलाई कविराज गहतराजले कोरियोग्रापी गरेका हुन् । यो फिल्ममा सम्राट बस्नेतको एक्सन, कविराज र रामजी लामिछानेको कोरियोग्राफी, सौरभ लामाको छायांकन, बनिश शाहको सम्पादन समीर मियाँको भीएफएक्स छ ।

मुस्ताङ र कास्कीका आकर्षक लोकेशनमा खिचिएको यो फिल्मलाई कमेडी, एक्सन र लभ स्टोरी कथामा निर्माण गरिएको छ । फिल्ममा सुरेश न्यौपानेको कथा, शम्भुजित बाँस्कोटा र सागर आले मगरको संगीत छ । सलोन सलिना फिल्मस्को व्यानरमा निर्माण भएको यो फिल्मलाई उपत्यकामा डीसीएन र रिच इन्टरटेन्मेन्ट तथा मोफसलमा एफडी कम्पनीले वितरण गर्दैछ ।