सुरक्षा पन्त र उषा रजक स्टारर ‘जुलेबी’ को प्रदर्शन मिति तय

फिल्म ‘जुलेबी’को प्रदर्शन मिति तय गरिएको छ । 

चार महिला पात्रको प्रेमकथामा आधारित यो फिल्मको निर्माण टिम र वितरण कम्पनी डिसीएन बिच कागजी सम्झौतासँगै आगामी भाद्र १ गतेबाट देशभर प्रदर्शन हुने भएको हो।  

प्रदर्शन मिति तयसँगै फिल्मको डिजिटल राइट्स पनि बिक्री गरिएको छ। यसको डिजिटल राइट्स डिएआर मुभिजले खरिद गरेको छ। डिएआर मुभिजका श्याम धिताल र फिल्मका कार्यकारी निर्माता नवीन भट्टबिच डिजिटल अधिकारको सम्झौता सम्पन्न भएको छ। 

एन्थोलोजी जनरामा निर्माण भएको फिल्मको शीर्ष भूमिकामा उषा रजक, सुरक्षा पन्त, निशा अधिकारी र मोनिका थापा छन् ।  फिल्ममा सुशील सिटौला, पुष्कर कार्की, तुफान थापा लगायत कलाकारको पनि अभिनय रहेको छ।  फिल्मले तीन घटनालाई चित्रण गर्ने कार्यकारी निर्माता नवीन भट्टले जानकारी दिए । ‘यी तीनै घटना लभ स्टोरी कथावस्तुमा आधारित छन्,’ भट्टले भने ।

फोर क्युब इन्टरटेन्मेन्टको ब्यानरमा निर्माण भएको यस फिल्मलाई गणेशदेव पाण्डेले निर्देशन गरेका हुन् । यसअघि उनले 'मञ्जरी, गाजा बाजा' फिल्म निर्देशन गरेका थिए । 

आभा शर्मा नेपाल निर्माता रहेको फिल्ममा विवेक खड्काको छायांकन, अन्जय खड्काको सम्पादन र उत्तम न्यौपानेको साउण्ड डिजाइन रहेको छ । 

यस्तै, फिल्म ‘जुलेबी’को केही देशहरूको ओभरसिज राइट्स पनि बिक्री भइसकेको निर्माण टिमले बताएको छ।