राजकुमार राइले घोषणा गरे ‘पापी मान्छे ३’, गोरिल्लाको अभिनय रहने

निर्माता राजकुमार राइले नयाँ फिल्म निर्माणको घोषणा गरेका छन् । राजकुमारको निर्माणमा तयार भएको फिल्म ‘पापी मान्छे र पापी मान्छे २’पछि यसको तेश्रो श्रृङ्खला ‘पापी मान्छे ३’ निर्माणको औपचारिक घोषणा गरिएको छ । 

यो फिल्मलाई ‘प्रोड्यूसर’ फिल्मका निर्देशक जनकदिप पराजुलीले निर्देशन गर्ने पक्का भएको छ । जनकदिपले आफ्नो जन्मदिनको अवसर पारेर फिल्म निर्देशनको घोषणा गरेको बताएका छन् । उनले सामाजिक संजालमा लेखेका छन्–‘पशु पशु जस्ता छैनन् । मानिस हुन खोजी रहेका छन् । मानिस मानिस जस्ता रहेनन्, पशु बन्न खोजी रहेका छन् ।’

फिल्ममा गोरिल्लालाई पनि अभिनय गराउने निर्देशक पराजुलीले बताएका छन् । गोरिल्लाको साथमा नेपाली फिल्मका लोकप्रिय कलाकारहरुको अभिनय फिल्ममा रहनेछ । यसअघि फिल्म ‘पापी मान्छे’मा बाँदर र कुकुरलाई अभिनय गराइएको  थियो । 

आर.सि पिक्चर्सको ब्यानरमा निर्माण हुन लागेको फिल्मको छायांकन चाँडै नै सुरु हुनेछ ।