सामाजिक संजालमा आँचलको चर्को आलोचना, कारण यस्तो

आफ्नो बोलीका कारण बारम्बार बिबादमा पर्दै आएकी आँचल शर्मा फेरि एकपटक विवादमा मुछिएकी छिन् । एक प्रतियोगितामा निर्णायक बन्न पुगेकी आँचलले बोलेको एक भिडियो बाहिरिएपछि उनको चर्को आलोचना भएको छ । विशेष गरि, सामाजिक संजाल टिकटक र इन्स्टाग्राममा आँचलको बौद्धिकतालाई लिएर प्रश्न पनि उठिरहेको छ । 

भएको के हो ?

३ दिन अगाडि काठमाडौंमा आयोजना भएको ‘आइसीई डिजाइनर रन वे १२’को अडिसनमा आँचल निर्णायकको रुपमा पुगेकी थिइन् । आयोजकले अडिसनको भिडियो इन्स्टाग्राममा लाइभ गरेको थियो । सो क्रममा आँचलले स्टेजमा वाक गर्दै गरेका एक यूवकको शरीरलाई लिएर आपत्तिजनक कुराहरू गरेको सुनिन्छ । 

उक्त भिडियोलाई गणेश नाम गरेका ती युवकले सामाजिक संजालमा पोष्ट गरेपछि प्रयोगकर्ताहरूले आँचलको बौद्धिकताको चर्को आलोचना गरेका छन् । साथै, अहिले आँचलको इन्स्टाग्राममा राखिएका तस्वीरमाथि पनि यही बिषयमा प्रतिक्रिया आइरहेका छन् । 

गणेश नाम गरेका यूवकले आफ्नो टिकटकमा लेखेका छन्–‘म यहाँहरुमाझ केही कुरा शेयर गर्दैछु । मलाई तपाइहरुको सबै प्रकारका प्रतिक्रियाहरू मन्जुरी छ । मैले भर्खरै मात्र ‘आईसीई डिजाइनर रनवे १२’को लागि अडिसन दिएको थियो । मैले आफ्नो भिडियो नेक्स्ट मोडल डट नेपालको इन्स्टाग्राम पेजमा भेटे तर त्यो हेर्दा म आफै अचम्मित भएको छु । सो प्रतियोगिताको एक निर्णायक आँचल शर्मा दवाडीले म स्टेजमा हिड्दाको पुरा समय मेरो ‘बडीसेमिङ’ गरेकी छिन् । ‘बडिसेमिङ’ राम्रो कुरा हुँदै होइन । यो तपाइहरु सबैलाई थाहा छ ।’

सार्वजनिक भिडियोमा आँचलले ‘उसले केही खाँदैन कि क्या हो’ भनेकी छिन् । उनको नजिकै रहेका एक पुरुषले ‘मेन्टेन’ गरेको होला भन्दा आँचलले ‘यसलाई मेन्टेन गरेको भनिदैन, कुपोषण भएको भनिन्छ’ भन्दै जवाफ दिएकी छिन् । 

गणेश नाम गरेका यूवक लेख्छन्–‘मलाई यो कुराको विश्वास नै लागिरहेको छैन, अझ विशेषगरि आँचलको मुखमा यो कुरा आउँदा । मलाई यो कुराले निकै नै पीडा भएको छ । आँचलको मुखबाट यस्तो कुरा आउँदा म अचम्मित छु ।’ ती यूवकले आँचललाई प्रश्न गर्दै भनेका छन्–‘तपाई पछाडि सधै यस्तै कुरा गर्नुहुन्छ हो ?’

उनले आँचललाई प्रश्न गर्दै लेखेका छन्–‘तपाई मेरो हिडाईको मुल्यांकन गर्न आउनु भएको हो न कि मेरो शरीरको । मैले सामाजिक संजालमा यो भिडियो कुनै सहानुभुती प्राप्त गर्नका लागि शेयर गरिरहेको छैन, तर हामी कस्तो व्यक्तिलाई ‘सेलिब्रिटी’ भनिरहेका छौं भनेर चिनाउन चाहन्छु ।’

गणेश नाम गरेका यूवकले सामाजिक संजालमा भिडियो सहित पोष्ट गरेपछि आँचल शर्माको आलोचना भइरहेको छ । अधिकांशले आँचललाई अरुको शरीरको मुल्यांकन गर्ने अधिकार नभएको भन्दै प्रतिक्रिया दिएका छन् । यसमा नायिका वर्षा राउतले समेत प्रतिक्रिया दिएकी छिन् । वर्षा लेख्छिन्–‘तिमी गज्जब छौं । तिम्रो आत्मविश्वासको म प्रशंसा गर्न चाहन्छु । सधै गज्जब गर्नु ।’

अधिकांश सामाजिक संजाल प्रयोगकर्ताहरुले यो बिषयमा बोल्नका लागि नेपाली फिल्मका अन्य नायिकाहरुलाई पनि आग्रह गरेका छन् । भिडियो सार्वजनिक भएसँगै आँचलको इन्स्टाग्राममा पोष्ट गरेका तस्वीरहरुमा समेत यही बिषयमा प्रतिक्रिया देख्न सकिन्छ ।