‘बगान’ ट्रेलरः आमाको बिहेको लागि छोरीले गरेको संघर्षको कथा

गतबर्ष बाबुको बिहेका लागि एक छोराले गरेको संघर्षको कथामा ‘महापुरुष’ निर्माण भएको थियो । अब, यो बर्ष एकल आमाको बिहेका लागि छोरीले गरेको संघर्षको कथामा नयाँ फिल्म बनेको छ । सरोज खनालको लेखन तथा निर्देशनमा तयार भएको फिल्म ‘बगान’ले एकल महिलाको कथा भन्छ । 

सुरेश वाग्लेको निर्माणमा तयार भएको यो फिल्मको ट्रेलर आज सार्वजनिक गरियो । ट्रेलरमा नायिका करिश्मा मानन्धर, नायक सरोज खनाल र कलाकार प्रमिला कार्कीलाई मुख्य स्थान दिइएको छ । यस्तै, नायक आकाश श्रेष्ठ फिल्ममा विशेष भूमिकामा छन् । 

फिल्म भित्र छोरीको जन्म भएपछि श्रीमान् गुमाएकी करिश्माको संघर्ष र उनको बिहेको कथा देखाइएको छ । फिल्ममा निर शाह, बसुन्धरा भुषाल, मिथिला शर्माको पनि मुख्य भूमिका छ । स्वप्निल निरभको कथामा तयार भएको फिल्ममा सुरेश वाग्लेको शब्द, हरि लम्साल र सुभाष भुषालको संगीत छ । 

गौरी शंकर धुजुको छायांकन रहेको फिलममा सन्देश शाहको सम्पादन छ । फिल्मका कार्यकारी निर्माता विनोद मानन्धर हुन् । यो फिल्म असारको २९ गतेबाट देशभरका हलमा रिलिज हुँदैछ ।