फरक भूमिका खोज्ने कोशिशलाई सफलता पाउनै गाह्रो

उसो त, कोशिश क्षेत्रीको परिचय गायकको हो । उनी आफूलाई गायक नै भन्न रुचाउँछन् । तर, उनले नायकको रुपमा पनि आफूलाई स्थापित गर्ने कोशिश गरिरहेका छन् । फिल्म ‘पर्व’ होस् या ‘परस्त्री’ । कोशिशले यी दुवै फिल्ममा आफूलाई फरक क्यारेक्टरमा उभ्याए । फिल्म ‘परस्त्री’मा उनले निर्वाह गरेको भूमिकालाई फिल्मीकर्मी, पत्रकारहरूले तारिफ गरे । डार्क थ्रिलर फिल्ममा कोशिशको उम्दा अभिनयले सबैलाई लोभ्याउँछ । 

तर, बक्स अफिसले भने उनलाई साथ दिइरहेको छैन । बक्स अफिसमा साथ नपाउँदा कोशिशले गरेको फरक कोशिशले पनि सार्थकता पाएको छैन । ‘पर्व, परस्त्री’ जस्ता फिल्महरू बक्स अफिसमा असफल हुँदा कोशिश पनि असफल भइरहेका छन् । 

वुझिएअनुसार, अब उनलाई डन ‘चरी’को बायोपिकमा काम गर्ने अफर आएको छ । कोशिशले यो भूमिकाका लागि आफू सकारात्मक रहेको पनि बताएका छन् । 

कोशिश आफू फिल्ममा केही फरक गर्ने कोशिशमा सधैं हुने बताउँछन् । आफूलाई डार्क थ्रिलर फिल्महरू बढी सुहाउने भएकाले पनि यस्तो भूमिकाको अफर बढी आएको उनको तर्क छ । 

कोशिशलाई अब बक्स अफिस सफलताको खाँचो छ । यदि, यसमा पनि उनी सफल भए भने उनको फिल्म करिअरले युटर्न लिनेछ ।