म्युजिक भिडियोमा क्रेज घट्दै गएपछि फिल्मको नायक बन्दै सागर लम्साल

कलाकार सागर लम्सालको क्रेज म्युजिक भिडियोमा पहिले जस्तो छैन । कुनै बेला दैनिक भिडियोमा व्यस्त हुने सागर अहिले कहिलेकाही दर्शकमाझ देखिन्छन् । यस्तै, उनी हाँस्य श्रृङ्खला ‘सक्किगोनी’मा पनि काम गरिरहेका छन् । यो कमेडी सिरियलबाट उनी दर्शकमाझ ‘बले’ नामले परिचित भए । 

उनै, सागर अब आफै फिल्म बनाउने तयारीमा लागेका छन् । आफ्नै कम्पनीबाट केही म्युजिक भिडियो बनाएपछि अब उनको यात्रा फिल्मतर्फ  लम्किएको हो । हुनत, उनले फिल्ममा काम नगरेका भने होइनन् । उनले, ‘लोफर, लज्जा, हैरान’ फिल्ममा काम गरेका छन् । 

सागर आफूलाई फिल्मको अफर आएपनि काम गर्न नसकेको बताउँछन् । तर, अब भने आफ्नै लगानीमा फिल्ममा काम गर्ने र अभिनय पनि गर्ने तयारी उनको छ । 

सागरका अनुसार, उनी यति बेला धमाधम फिल्मको स्क्रिप्टमा व्यस्त छन् । यो बर्ष ‘सक्किगोनी’को टिमले बनाउने फिल्ममा काम गर्ने र अर्को बर्षदेखि आफूले लगानी गर्न लागेको फिल्मको काम सुरु गर्ने योजना उनको छ । 

सागरले फिल्मका लागि निर्देशक समेत फाइनल गरिसकेका छन् । तर, उनले सार्वजनिक भने गरेका छैनन् । 

म्युजिक भिडियोमा काम गर्दै फिल्ममा पनि अभिनय गर्ने कलाकारहरूको संख्या राम्रै छ । अब, सागर भने फिल्ममा लगानी गर्दै मुख्य भूमिकामा देखिने तयारीमा छन् । म्युजिक भिडियोमा घट्दै गएको उनको क्रेज फिल्ममा काम गरेपछि भने फर्किएला त, प्रतीक्षा गर्नैपर्नेछ ।