प्रिमियरमा उच्च प्रशंसा पाएको ‘परस्त्री’ आजबाट हलमा

बुधबार आयोजना भएको प्रिमियरमा उच्च प्रशंसा पाएको फिल्म ‘परस्त्री’ आजबाट देशभरका हलमा रिलिज भएको छ । यो फिल्म भोलीबाट भने भारतका हलमा रिलिज हुनेछ । 

दीपेन्द्र के खनालको लेखनमा सुरज पाण्डेले निर्देशन गरेको यो फिल्मले प्रिमियरमा तारिफ नै तारिफ कमाएको थियो । सुरजले सस्पेन्स थ्रीलर कथामा उत्कृष्ट फिल्म बनाएको प्रतिक्रिया अधिकांश फिल्मीकर्मीको थियो । 

शर्मिला पाण्डेको निर्माणमा तयार भएको फिल्ममा निरज कँडेलको छायांकन छ । फिल्ममा शिल्पा मास्के, कोशिश क्षेत्री, गौरव बिष्ट लगायतका कलाकारले अभिनय गरेका छन् । 

फिल्म ‘परस्त्री’का मुख्य तीन कलाकारले उत्कृष्ट काम गरेका छन् । शिल्पालाई यसअघिका फिल्ममा हेर्दै आएका दर्शकले यसपटक सरप्राइज पाउनेछन् । कोशिशको अभिनय वेजोड छ ।

नायक गौरव बिष्टले दोश्रो फिल्ममा नै आफूलाई फिल्म क्षेत्रको लामो रेशको घोडाको रुपमा अगाडि बढाउने संकेत गरेका छन् ।

यो फिल्मलाई निर्देशक सुरज पाण्डेले जुन तरिकाले प्रस्तुत गरेका छन्, जसले दर्शकलाई हलको सिटबाट उठ्न दिदैन । सुरजले डेब्यू फिल्ममा नै प्रशंसा पाइरहेका छन् । 

भोलीबाट रिलिज हुने भनिएतापनि यो फिल्मलाई बकर इदको बिदा परेका कारण आजैबाट रिलिज गरिएको हो ।