पलसँग पाँचौ म्युजिक भिडियो खेल्दा सनिषालाई कति फाइदा ?

नायक तथा मोडल पल शाहले जेल जीवनबाट बाहिर आएपछि निरन्तर म्युजिक भिडियोमा काम गरिरहेका छन् । पल शाहको म्युजिक भिडियोको संख्या दर्जन पुग्न लागेको छ । 

यसमध्ये पलले करिब आधा दर्जन भिडियो त मोडल सनिषा भट्टराईसँग नै खेलिरहेका छन् । 

पलले सनिषासँग जेलबाट निस्किएपछि पहिलो म्युजिक भिडियोमा काम गरे । ‘तिमीलाई हेर्ने बानी पर्यो’ बोलको गीतको फिमेल भर्सनमा सनिषासँग पलको जोडी बाँधिएको थियो । यसपछि, उनीहरूले निरन्तर काम गरिरहेका छन् । पललाई अरु मोडल भन्दा सनिषा नै काम गर्न सहज भएको देखिन्छ । 

पाँचौ भिडियो ‘त्यो पल’ भोलि सार्वजनिक हुँदैछ । पल शाहको जोडी विभिन्न चरणमा विभिन्न मोडल तथा नायिकासँग जमेको पाइन्छ । जसमध्ये पलको जोडीको रुपमा गरिमा शर्मा, मलिका महत्त बढी रुचाइएका थिए । 

तर, अहिले यी पलसँग गरिमा र मलिकाको जोडी बाँधिएको छैन । बरु, सनिषाले भने पलसँग निरन्तर काम गरेर आफूलाई व्यस्त बनाइरहेकी छिन् । उसो त, सनिषालाई दर्शकले ‘ए हो र माया’ बोलको गीत सुपरहिट भएपछि रुचाउन थालेका हुन् । तर, अहिले पलसँग निरन्तर काम गरेपछि उनी झनै चर्चामा छिन् । पलसँग काम गर्दा सनिषालाई नै बढी फाइदा भइरहेको छ । पछिल्लो समय बजारमा चलेका मोडलको नाम लिनुपर्दा सनिषा अग्रपङ्क्तिमा छिन् ।