भारतमा सच्चिएको छैन ‘आदिपुरुष’को संवाद, भोलीबाट हिन्दी फिल्म रोक्ने बालेनको तयारी

नेपालमा मात्र नभएर भारतमा समेत दक्षिण भारतीय फिल्म ‘आदिपुरुष’ विवादित बनेको छ । विशेषगरि, ‘रामायण’को भावनामाथि यसका मेकरले छेडछाड गरेको आरोपमा त्यहाँका दर्शकहरु नै आक्रोशित छन् । फिल्मलाई विभिन्न राज्यमा रोक लगाउने तयारी समेत गरिएको छ । 

यसैबिच, यो फिल्मका लेखक मनोज मुंतशिरले नेपालको बिषयमा दिएको एक बयानले फेरि नेपाली जनतालाई आक्रोशित बनाएको छ । उनले भनेका छन्–‘नेपालको विरोध मैले वुझ्न सकेको छैन । यसकारण वुझ्न सकिनँ कि, यो कहानी त्यतिबेलाको हो, जतिबेला नेपाल भारतको अंश रहेको थियो । त्यही भएर हामीले सितालाई भारतकी छोरी भनिरहेका छौं । नेपाल त सन् १९०३ वा सन् १९०४ मा भारतबाट अलग भएको हो । यसैले, सीता भारतकी थिइन् । मैले यसैले नेपालको विरोध वुझ्न सकेको छैन ।’

‘रामायण’मा स्पष्ट रुपमा सीता नेपालको जनकपुरमा जन्मिएको र राम नेपाल आएर सीतासँग बिहे गरेको  उल्लेख छ । तर, ‘आदिपुरुष’का लेखकले यसलाई पुरै तोडमोड गरेर अभिव्यक्ति दिइरहेका छन् ।

यो अभिव्यक्तिको समेत चर्को विरोध भैरहेको समयमा काठमाडौं महानगरपालिकाले भोलीबाट महानगर भित्रका कुनै पनि हलमा हिन्दी फिल्म नचलाउन निर्देशन दिइसकेको छ । भारतमा पनि फिल्ममा ‘जानकी भारतकी हुन्’ भन्ने आशयको संवाद अहिलेसम्म हटाएको खबर प्राप्त नभएको मेयर बालेन शाहको सचिवालयले मेरो फिल्मलाई जानकारी दिएको छ । 

भोलीबाट महानगर भित्रका हलमा हिन्द फिल्म रोकिन्छ त भन्ने प्रश्नमा सचिवालयका एक सदस्यले भने–‘हामीले सूचना तथा संचार मन्त्रालयलाई पत्र पठाइसकेका छौं । यसैले, भोलीबाट हिन्दी फिल्म रोकिन्छ ।’