हिन्दी डब नेपाली फिल्मका लागि स्पष्ट नियम ल्याउन आवश्यक

सोमबार चलचित्र विकास बोर्डमा नेपाली फिल्म ‘परस्त्री’को हिन्दी डबलाई नेपालमा रिलिज गर्नका लागि निर्मात्री शर्मिला पाण्डे, वितरक करण श्रेष्ठ, निर्देशक सुरज पाण्डे र लेखक दीपेन्द्र के खनालको दौडधुप देखियो । 

तर, उनीहरुले दौडधुप गर्दै गर्दा चलचित्र विकास बोर्डमा भने हिन्दी डबलाई कुन फिल्मको सरह प्रदर्शनको अुनमति दिने भन्नेमा अन्यौल देखिएको थियो । 

चलचित्र विकास बोर्डले यस अगाडि फिल्म ‘प्रेमगीत ३’को हिन्दी डबलाई हिन्दी फिल्म सरह नै प्रदर्शनको अनुमति दियो । तर, सूचना तथा संचार प्रविधि मन्त्रालयले बोर्डको निर्णयलाई उल्टाइदियो । जसकाकारण, ‘प्रेमगीत ३’को हिन्दी डबले पनि नेपाली फिल्म सरह नै सुविधा पाएको थियो । 

तर, ‘परस्त्री’को निर्माण टिमले भने हिन्दी फिल्म सरह नै अनुमति दिन आग्रह गरेको थियो । विकास बोर्ड अध्यक्ष भुवन केसी भने हिन्दी फिल्म सरह नै अनुमति दिने वा नेपाली फिल्म सरह अनुमति दिने भन्नेमा छलफलमा देखिए । 

यदि, हिन्दी फिल्म सरह अनुमति दिने हो संचार मन्त्रालयले फेरि विकास बोर्डसँग स्पष्टिकरण सोध्ने डर थियो । यदि, नेपाली फिल्म सरह नै सुविधा दिने हो भने गलत नजिर बसिसकेको थियो । 
चलचित्र विकास बोर्डले अब हिन्दी भाषामा डब भएर नेपाल भित्रिएका नेपाली फिल्मलाई कुन फिल्मको सरह सुविधा दिने भन्नेमा स्पष्ट नियम बनाउन आवश्यक देखिएको छ ।

होइन भने, नेपाली फिल्मले हिन्दी भाषामा पनि डब गरेर नेपालमा रिलिज गर्ने क्रम बढ्दै गएको अवस्थामा विकास बोर्डमा अन्यौलता सधै देखिने पक्का छ । संचार मन्त्रालयले पनि यस बिषयमा गम्भिर भएर नियम बनाउन आवश्यक छ ।