नम्रताको हातमा धमाधम अवार्ड

नायिका नम्रता श्रेष्ठ आफू कुनै पनि अवार्ड समारोहमा आयोजकले बोलाएपछि पुग्ने गरेको बताउँछिन् । नम्रताका अनुसार, अवार्ड पाउने पक्का भएपछि मात्र पुग्नु गलत हो । उनले, अवार्ड पाउने अरु प्रतिस्पर्धीहरुलाई हौसाल प्रदान गर्न पनि यस्ता समारोहमा पुग्न आवश्यक रहेको बताइन् । 

तर, नम्रताको हातमा म्युजिक भिडियोको अवार्ड भने धमाधम पर्न थालेको छ । केही हप्ता अगाडि आयोजना भएको ‘स्पर्श म्युजिक भिडियो अवार्ड’मा नम्रताले ‘पपुलर म्युजिक भिडियो मोडल’को अवार्ड प्राप्त गरिन् ।

सो समयमा प्रतिक्रिया दिदै नम्रताले आफूले अवार्ड पाउने भन्ने बिषयमा कुनै पनि जानकारी नपाएको बताएकी थिइन् । सो कार्यक्रममा नम्रताले नायिका विपना थापाको चर्चित गीतहरुमा नृत्य गरेकी थिइन् । 

उनै, नायिकाले ‘उत्कृष्ट नायिका फिचर फिल्म’ अवार्ड प्राप्त गरिन् । ‘तेश्रो स्पाइनी बब्लर अन्तरराष्ट्रिय फिल्म फेस्टिभल’मा उनले उत्कृष्ट नायिकाको अवार्ड जितेकी हुन् । यो अवार्ड प्राप्त गर्दा आफू अझै खुशी भएको उनको तर्क थियो । फिल्म ‘डेसान’बाट उनले यो अवार्ड प्राप्त गरेकी हुन् । 

नम्रताको हातमा फिल्मको संख्या खासै छैन । म्युजिक भिडियो पनि उनले फाट्टफुट्ट रुपमा मात्र गर्दै आएकी छिन् । तर, उनले अवार्ड भने एकपछि अर्को रुपमा प्राप्त गरिरहेकी छिन् ।