प्रिमियरमा ‘निरफूल’लाई प्रशंसा

फूलमान बलको निर्देशनमा तयार भएको फिल्म ‘निरफूल’को बुधबार बेलुकी काठमाडौंको विग मुभिजमा प्रिमियर गरिएको छ । फिल्मका मुख्य कलाकारहरु दयाहाङ राई, शान्ती वाइवा, वुद्दि तामाङ लगायतका कलाकारहरु पुगेका थिए । साथमा फिल्म हेर्न निर्देशक दीपेन्द्र लामा, कलाकार लुनिभा तुलाधर पनि कमलपोखरी हलमा पुगे । 

विशेषगरि, यो फिल्मले धादिङको एक परिवारले भूकम्पपछि भोगेको समस्याको कथालाई भन्छ । आर्थिक अवस्था कमजोर भएपछि विदेश जान वाध्य श्रीमान्, भूकम्पका कारण छोरी हराएपछि काठमाडौंमा भौतारिएकी श्रीमति र सरकारी कर्मचारीहरुले दिएको दुःखको कथामा यो फिल्म बनाइएको छ । 

५ बर्ष अगाडि निर्माण भएपनि विभिन्न कारणले रिलिज हुन नपाएको फिल्मले दर्शकले वि.सं २०७२ सालको भूकम्पको याद गराउँछ । साथमा, एउटा परिवारले भोग्नु परेको पीडाले दर्शकको मन छुन सक्छ । 

नेपाली दर्शकले अर्गानिक कथामा बनेका फिल्मलाई रुचाइरहेका छन् । यस्तो अवस्थामा नेपाली परिवेशकै कथामा बनेको यो फिल्मले पनि राम्रो व्यापार गर्ने अपेक्षा गर्न सकिन्छ ।