ज्ञानेन्द्रको जन्मदिनमा पूजा, रेखा र छविको सरप्राइज

नायिका पूजा शर्माले रेखा थापाको निर्माण तथा ज्ञानेन्द्र देउजाको निर्देशनमा बन्न लागेको एक अनटाइटल प्रोजेक्टमा काम गर्दैछिन् । यो फिल्मलाई उत्कृष्ट बनाउन निर्देशक देउजा पनि लागिपरेका छन् । उनी केही महिनादेखि स्क्रिप्टमा गम्भिर भएर लागिरहेका छन् । उनै, देउजा आज आफ्नो जन्मदिन मनाइरहेका छन् ।

फिल्म ‘झिंगे दाउ’पछि फिल्म क्षेत्रमा बलियो दोश्रो इनिङको सुरुवात गरेका उनको जन्मदिनको अवसरमा नायिका पूजा शर्मा र रेखा थापाले सरप्राइज दिएका छन् । एफडी कम्पनीमा पुगेर रेखा र पूजाले ज्ञानेन्द्रको जन्मदिन सेलिव्रेशन गरे । 

ज्ञानेन्द्रको जन्मदिनको केक काट्ने कार्यक्रममा निर्माता छविराज ओझा समेत सहभागी थिए । ज्ञानेन्द्रले छविकै निर्माणमा तयार हुन लागेको फिल्म ‘जेल ब्रेकर’ समेत निर्देशन गर्दैछन् । 
नायिका पूजा शर्मा र रेखा थापाको मित्रता पछिल्लो केही महिनायता बलियो बनेको छ । एकसाथ फिल्ममा काम गर्ने भएपछि यी दुई अझै नजिक भएका हुन् ।

यस्तै, निर्देशक देउजाले पनि पूजा र रेखाको मुख्य भूमिका रहने फिल्मका लागि आफूले निकै मिहिनेत गरिरहेको सुनाए । पूजा, रेखा र छविको सरप्राइज बर्थ डे केकले आफूलाई खुशी मिलेको उनको भनाई थियो ।