५१ औं दिनमा 'जारी', अकुपेन्सी ३५ प्रतिशत

गत वैशाख १ गतेदेखि प्रदर्शनमा आएको फिल्म ‘जारी’ले ५१ औं दिनको यात्रा तय गरेको छ । नयाँवर्षकै दिन प्रदर्शनमा आएको फिल्मले दर्शकलाई नयाँ स्वाद पनि दिएको छ । लिम्बु संस्कृतिमा आधारित जारी प्रथालाई विषयवस्तु बनाइएको फिल्मले राम्रो ‘माउथ पब्लिसिटी’ पाएपछि ५१ औं दिनको यात्रा तय गर्न सफल भएको हो ।

उपेन्द्र सुब्बाको लेखन तथा निर्देशन रहेको फिल्मले बाल दर्शकदेखि वृद्धवृद्धासम्मका दर्शकलाई डोहो¥याएको थियो । बिहीबारसम्म पनि फिल्मप्रति दर्शकको क्रेज उस्तै छ । यो क्रेज स्वदेशमा मात्र होइन, विदेशमा पनि जारी नै छ ।

अभिनेता दयाहाङ राई र अभिनेत्री मिरुना मगर वरपर घुम्ने कथाले दर्शकलाई मौलिक स्वाद चखाउन सफल भएको छ । फिल्ममा विजय बराल, प्रेम सुब्बा, पुष्कर गुरुङ, अनिल सुब्बा, रोय दिपलगायतका कलाकारको समेत अभिनय रहेको फिल्मले दर्शकबाट राम्रो तारिफ पनि पाइरहेको छ । फिल्मका निर्माता रामबाबु गुरुङ हुन् ।

बक्सअफिस रिपोर्ट अनुसार फिल्मले बुधबारसम्म १४ करोड २० लाख २२ हजारमाथि ग्रस कलेक्सन गरेको छ । यो अवधिमा फिल्मले ५ हजार ६ सय ५ शो पाउँदा ती शोमा १४ लाख २८ हजार १ सय ५९ दर्शकले फिल्म हेरेका छन् । 

दर्शक संख्यालाई आधार मान्दा ५ लाख ६ हजार ७ सय ६२ टिकट बिक्री भएका छन् । हालको अकुपेन्सी ३५ प्रतिशत देखिएको छ । यो तथ्यांक बक्सअफिस लागु भएका थिएटरलाई आधार मानी लिइएको हो । निर्माताले भने बक्सअफिस लागु भएका र लागु नभएका हलबाट १७ करोड बढी ग्रस कलेक्सन गरेको दाबी गरेका छन् ।