फरक भूमिका पर्खदै आकाश, के मेकरले पत्याउलान् ?

नायक आकाश श्रेष्ठको चर्चा जती लुक्सका कारण हुन्छ, अभिनयका कारण कहिले हुन सकेन । उनले ‘म त तिम्रै हुँ’देखि ‘सम्हालिन्छ कहिले मन’सम्म आइपुग्दा आधा दर्जन बढी फिल्ममा काम गरे । तर, उनले यी सबै फिल्ममा गरेको अभिनयले न त दर्शकको मन जित्यो न त समीक्षकको नै । 

बरु, उनको अभिनय एकै खालको भएको टिप्पणी भैरहेको छ । गतबर्ष रिलिज भएका २ फिल्म ‘संझना विर्सना र सम्हालिन्छ कहिले मन’ले बक्स अफिसमा कमजोर व्यापार गरेपछि आकाशमाथि लगानी गर्ने निर्माता पनि छैनन् । यी दुबै फिल्म कोभिड अगाडि छायांकन भएका हुन् । यसरीहेर्दा, आकाशले फिल्मका लागि एक्सन र कट नसुनेको पनि २ बर्ष बढी भैसकेको छ । उनले पहिलो लकडाउनपछि फिल्म ‘हिड्दा हिड्दै’मा काम गरे । तर, यो फिल्म पनि रिलिज हुने कुनै संभावना नै छैन । वुझिएअनुसार त यो फिल्मको छायांकन पनि पुरा भएको छैन । 

उनै, आकाशले आफू नयाँ लुक्समा देखिन र फरक शैलीमा दर्शकमाझ आउनका लागि वर्कआउट गरिरहेको बताएका छन् । उनले, दर्शकलाई आफूहरुले गर्ने काम स्वभाविक लाग्नुपर्ने र कुनै पनि चरित्रलाई न्याय गर्न सक्नुपर्ने बताए । आकाशले आफू फरक खालको भूमिकामा काम गर्ने सोचका साथ अगाडि बढेको र त्यस्तै खालको कथा खोजेको बताएका छन् । 

हुनत, धेरै कलाकारले फिल्म नपाएपछि फरक भूमिका खोजेकाले अफर आएका फिल्म छाडेको जवाफ दिदै आएका छन् । सायद, आकाशको जवाफ पनि यसकै निरन्तरता हुन सक्छ । 

तर, अहिलेसम्म फरक भूमिका गर्न नसकेको, नायिका पूजा शर्माका कारण चलेको भन्ने जस्ता आरोप भोगेका आकाशले आफूलाई फरक तरिकाले प्रस्तुत गर्न सके भने उनको करिअरका लागि नै सुनमा सुगन्ध हुनेछ ।