‘सतीदेवी’ को छायाङ्कन सम्पन्न

लक्ष्मण सुवेदी निर्देशित फिल्म ‘सतीदेवी’ को छायाङ्कन सम्पन्न भएको छ । 

फिल्मको छायाङ्कन २३ दिनमा सकाएर निर्माण टिम सम्पादनमा सुरु भइसकेको छ । फिल्मको काठमाडौँ र लमजुङ आसपासका स्थानमा छायाङ्कन भएको हो । 

दिलाशा क्रियसन तथा गोल्डेन स्टेट मुभी मेकर्स एलएलसी क्यालिफोर्नियाको सहकार्यमा निर्माण भइरहेको फिल्ममा सञ्चारकर्मीसमेत रहेका निर्देशक सुवेदीकै कथा, पटकथा, संवाद रहेको छ । 

सुवेदीको यो नारीप्रधान फिल्म ‘सतीदेवी’को केन्द्रीय भूमिकामा अभिनेत्री मल्लिका महत छिन् । यो फिल्म एक ग्रामीण भेगकी युवतीको संघर्ष र आरोह अवरोहको कथा प्रस्तुत गरिएको छ ।

फिल्ममा महतको अलावा रमेश बुढाथोकी, भोलाराज सापकोटा, कुलदीप अधिकारी, सन्दीपबाबु लोहनी सृजना अधिकारी, मनीषा सापकोटा, सुजिता सिवाकोटी लगायतको अभिनय रहेको छ ।

यो फिल्मको ‘खोटो सिक्का’ बोलको गीत समेत रेकर्ड सम्पन्न भइसकेको छ । उक्त गीतमा शब्द स्वयं सुवेदीकै छ भने सुवास भुषालको संगीत र ममता गुरुङको स्वर छ । यो गीतमा रामजी लामिछानेले कोरियोग्राफी रहेको छ ।