सरोज–विकासको सहकार्य, के काम गर्न तयार होलान् राजेश र शिव ?

नायक सरोज खनालले निर्माण गरेको फिल्म ‘बगान’ गत बर्ष नै रिलिज हुनुपर्ने हो । तर, यो फिल्मको गीत सार्वजनिक भएर प्रदर्शन मिति पनि तय गरिएको थियो । तर, फिल्म रिलिजको कुनै सुरसार छैन । 

यसैबिच, सरोज नयाँ फिल्म बनाउने तयारीमा लागेका छन् । उनले, निर्देशक विकासराज आचार्यसँग सहकार्य गर्दै नयाँ फिल्म बनाउने बिषयमा कुरा अगाडि बढाएका छन् । यो बिषयमा विकासले मेरो फिल्मसँग भने–‘मेरो र सरोज खनालबिच ३ चरणको कुराकानी भएको छ । तर, अहिलेसम्म कुनै पनि बिषयमा फाइनल कुरा भएको छैन ।’

सरोजको सोच भने यो फिल्ममा राजेश हमाल र शिव श्रेष्ठलाई लिने छ । तर, उनले यी दुबै नायकलाई अफर भने गरेका छैनन् । राजेश हमालका लागि लेखिएको भूमिका एकदमै फरक भएकाले उनी काम गर्न तयार हुने सरोजको विश्वास छ । उसो त, राजेश हमालले फिल्ममा काम गर्ने भनेर चर्चा भएको लामै समय भैसकेको छ । तर, हमालले फिल्म साइन नै गर्न सकिरहेका छैनन् । 

विकासको निर्देशनमा बन्ने फिल्ममा राजेश, शिव र सरोज एकसाथ आए भने दर्शकका लागि त्यो फरक स्वाद हुनेछ । तर, के तिन कलाकार एकसाथ पर्दामा देखिएलान् त ? प्रतिक्षा गर्नैपर्छ ।