अलमलमा अनमोल केसी

गतबर्ष रिलिज भएको फिल्म ‘छड्के २’ बक्स अफिसमा असफल भएपछि नायक अनमोल केसीले नयाँ फिल्म कुन गर्ने निर्णय लिन सकेका छैनन् । उनले २ वटा फिल्म साइन गरिसकेका छन् । तर, पहिला कुन फिल्मको छायांकन सुरु हुन्छ भन्ने अझै पक्का भएको छैन । 

अनमोलले फिल्म ‘जेरीः अन टप’ साइन गरेका छन् । निर्माणपक्षले केही हप्ता अगाडि मिडियालाई दिएको जानकारी अनुसार यो फिल्मको छायांकन मंगलबारबाट सुरु हुनु पर्ने हो । तर, अझै पनि यो फिल्मको स्क्रिप्टमै काम भैरहेको वुझिएको छ । 

यसैले, यो फिल्मको छायांकन कहिलेबाट सुरु हुन्छ अझै भन्न सकिने अवस्था छैन । अनमोलले अर्को एउटा फिल्म पनि साइन गरेका छन् । यो फिल्मको छायांकन जेठबाट सुरु गर्ने तयारी छ । यो बिषयमा अनमोलले केही पनि बताउन चाहेनन् । 

अनमोलका अनुसार, उनी जुन फिल्मको स्क्रिप्टको काम पहिले सकिन्छ सोही फिल्ममा काम गर्ने सोचमा छन् । यस्तै, उनका पिता भुवन केसीले भदौबाट फिल्म ‘माइतीघर २’को छायांकन सुरु गर्ने बताएका छन् । फिल्मलाई रामबाबु गुरुङले निर्देशन गर्ने चर्चा छ । 

यसरीहेर्दा, अनमोलले कुन फिल्ममा काम गर्ने भन्ने निर्णय नै लिन सकेका छैनन् । गतबर्ष नराम्रोसँग बक्स अफिसमा डुबेपछि अनमोल फिल्ममा काम गर्ने बिषयमा गम्भिर देखिएका छन् ।