बोल्ड अवतारले बदलिएला शिल्पाको करिअर ?

नायिका शिल्पा मास्केले केही फिल्ममा अभिनय गरेकी छिन् । उनले अभिनय गरेको फिल्म ‘कागजपत्र होस् या द ब्रेकअप’, दर्शकले नोटिस नै गरेनन् । शिल्पाका लागि यी फिल्महरू नचल्दा निराश हुनुपर्ने अवस्था आयो । 

फिल्म क्षेत्रमा नयाँ आशाको साथ प्रवेश गरेकी शिल्पाका लागि यी फिल्महरू पनि नचलेपछि के गर्ने के नगर्ने भन्ने अन्योल थियो । 

उनले, फिल्म ‘द ब्रेकअप’मा दिएका केही चुम्बनका दृश्यले बरु चर्चा पाए । तर, दृश्यले चर्चा पाउँदा पनि शिल्पाको चर्चा भएन । 

फिल्म ‘फूलबारी’मा शिल्पाको केमियो भूमिका थियो । फिल्मले ठीकठाक व्यापार गरे पनि यसको क्रेडिट त शिल्पालाई जाने कुरा नै भएन । 

उनै, शिल्पा असारको १५ गते आफ्नो बोल्ड छविका साथ दर्शक माझ आउँदैछिन् । उनले, सुरज पाण्डेको निर्देशनमा बनेको फिल्म ‘परस्त्री’मा खिचाएको बोल्ड तस्विरले पोष्टरमा स्थान पाइसकेको छ । तर, फिल्ममा उनले दिएको दृश्यको विषयमा त दर्शक बेखबर नै छन् । 

वुझिएअनुसार, फिल्ममा शिल्पा हट बनेकी छिन् । उनका कैयौं, अन्तरंग दृश्यहरु फिल्ममा समावेश छन् । यी दृश्यहरुका कारण पनि फिल्मलाई सेन्सर बोर्डले अड्काउँछ या के गर्छ भन्नेमा निर्माण पक्ष दोधारमा छन् । 

तर, यदि फिल्मका यी दृश्यलाई एडल्ट सर्टिफिकेट दिएर सेन्सर बोर्डले रिलिजको अनुमति दियो भने शिल्पाको चर्चा पक्कै हुनेछ । फिल्मको पोस्टरले धेरै कुरा बताइसकेको छ । 

शिल्पा मास्के आफ्नो बोल्ड अवतारले करिअर नै बदल्ने दाउमा छिन् । ‘परस्त्री’ चल्यो भने उनले करिअरमा लिएको एउटा जोखिम सफलतामा बदलिनेछ ।