सविनको ‘बाघचाल’ घोषणा, फिल्ममा ३ नायक र २ नायिका रहने

नायक सविन श्रेष्ठले नयाँ फिल्मको घोषणा गरेका छन् । उनले, उतरगया म्युजिक एण्ड फिल्मस्सँग सहकार्य गर्दै निर्माण गर्न लागेको फिल्मको नाम ‘बाघचाल’ राखिएको छ । यो फिल्ममा राजिव गुरुङ्ग (दिपक मनाङ्गे)को प्रस्तुति रहनेछ । 

यो फिल्मकमो कथा शिवम् अधिकारीले लेखिरहेका छन् । सम्राट बस्नेतले यो फिल्मको निर्देशन गर्ने पक्का भएको छ । 

फिल्मलाई एक्सनप्रधान बनाउने तयारीमा निर्माणपक्ष छ । उसो त, ‘बाघचाल’ नाममा यसअगाडि पनि फिल्म बनिसकेको थियो । तर, एउटा फिल्म निर्माण भएको १० बर्षपछि सोही नाममा अर्को फिल्म बनाउन पाइने भएकाले पनि सविनले ‘बाघचाल’ बनाउन लागेका हुन् । 

सविनले यस अगाडि फिल्म ‘हिरो रिटन्र्स’ निर्माण गरेका थिए । तर, यो फिल्म रिलिजमा समस्या भयो । यसैले, यसपटक अगाडि गरेका सबै गल्तीहरुलाई हटाएर काम गर्ने सविनको तयारी छ । 

यो फिल्ममा ३ जना नायक र २ जना नायिका रहने पक्का भएको छ । सविन आफैले भने नायक वा खलनायकमा कुन भूमिका निर्वाह गर्ने पक्का भएको छैन । फिल्मका लागि एक जना नायिका मुम्बईबाट नेपाल ल्याउने तयारीमा सविन र उनको टिम छ । सविनका अनुसार, नायिकासँग साइन गर्न एक सातापछि फिल्मको टिम मुम्बई उड्नेछ । 

फिल्मलाई नेपाल र अष्ट्रेलियामा छायांकन गरिनेछ । चाडै नै फिल्मको छायांकन सुरु गर्ने  सविनले जानकारी दिए ।