‘जारी’ले दिएको सन्देशः उत्कृष्ट फिल्मले बलिउड स्टारसँग डराउनुपर्दैन

वैशाखको ८ गते अर्थात शुक्रबार बलिउड  फिल्म ‘किसीका भाई किसीका जान’ रिलिज हुने पक्का थियो । यसैले, यो फिल्मसँग जुध्ने हिम्मत कुनै पनि नेपाली फिल्मका निर्माताले गरेनन् । बरु, उनीहरु आफ्नै देशमा बनेको फिल्मसँग जुध्न तयार भए । तर, बलिउड फिल्मसँग रिलिज गर्ने हिम्मत गरेनन् ।

बलिउड नायक सलमान खान र नायिका पूजा हेग्डे अभिनित यो फिल्म शुक्रबारदेखि रिलिज त भयो । तर, यो फिल्मलाई वैशाख १ गतेबाट रिलिज भएको नेपाली फिल्म ‘जारी’ले नै चेपुवामा पार्दियो । दोश्रो सातामा प्रवेश गरेको नेपाली फिल्ममाथि नै प्रदर्शकको भर बढी देखियो । दर्शकले पनि सलमानको भन्दा दोश्रो हप्तामा रिलिज भैरहेको नेपाली फिल्मलाई बढी साथ दिएका छन् । 

यसले अब के सन्देश दिएको छ भने, उत्कृष्ट फिल्म बनाएको खण्डमा बलिउडका स्टार नायकहरुका फिल्मसँग पनि डराउनुपर्ने अवस्था छैन । यस्तो समयमा, अब बलिउडका सामान्य फिल्मसँग नेपाली मेकर डराउनुपर्ने त कुरै भएन । 

कुनै समय बलिउडका स्टारका फिल्मसँग नेपाली फिल्मका निर्माता छेउ पर्न पनि डराउथ्य । तर, अब बलिउडका फिल्म पनि उत्कृष्ट बनेनन् भने दर्शकले मन पराउन छाडेको अवस्था छ । यसैले, अब नेपाली फिल्म दर्शकको स्वाद अनुसार बनाउने हो भने विदेशी फिल्मसँग र विदेशी स्टारसँग पनि डराउनुपर्ने अवस्था छैन ।