पूजाले खोजिन् रेखाको फिल्मका लागि नायिका, के आँचल बाहिरिएकी हुन् ?

नायिका पूजा शर्माले बुधबार बिहान एक तस्विर पोष्ट गरिन् । तस्विरमा उनले नायिका रेखा थापाले बनाउन लागेको नयाँ फिल्मको बारेमा नयाँ कुरा खोलेकी छिन् । रेखाको निर्माणमा ज्ञानेन्द्र देउजाले निर्देशन गर्न लागेको अनटाइटल प्रोजेक्टमा रेखा थापा र पूजा  फाइनल भइसकेका छन् । फिल्ममा तेस्री नायिकाको रुपमा आँचल शर्माले काम गर्ने खबर सार्वजनिक भइसकेको थियो ।

तर, यो खबर सार्वजनिक भएको केही दिनमा आँचल फिल्मबाट बाहिरिएको खबर पनि सार्वजनिक भयो । तर, निर्देशक देउजाले आँचल फिल्मबाट बाहिरिएको खबरलाई गलत भने । 

तर, मंगलबार बिहान पूजाले सार्वजनिक गरेको तस्विरले भने आँचल शर्मा  फिल्ममा नरहेको पुष्टि गर्दछ । पूजाले आफू र रेखाको तस्विर राख्दै तेस्रो नायिका को राख्दा ठीक होला भन्दै दर्शकसँग मत मागेकी छिन् । उनको यो स्टाटसले फिल्मबाट अब आँचल नहुने पक्का जस्तै देखाउँछ । 

तीन जना नायिकाको मुख्य भूमिका रहने फिल्मको छायांकन वैशाखको अन्तिम साताबाट सुरु हुनेछ । पूजा र आँचलले एकैसाथ फिल्म खेल्न लागेको खबर सार्वजनिक हुँदा यी दुवैका फ्यानले विभिन्न खालका विचार राखेका थिए । तर, पूजा र आँचलको सहकार्य टुटेको सामाजिक संजालमा पूजाले राखेको तस्विरबाट पुष्टि हुन्छ ।