पब्जी लाइभमा सलिनमानको गुनासो–‘राम्रो फिल्मबाट अफर नै आएन’

फिल्म ‘ए मेरो हजुर २’मा काम गरेपछि नायक सलिनमान बनियाँको चर्चा खुबै भयो । यो फिल्म हिट भएपछि सलिनमानलाई नेपाली फिल्मको नयाँ स्टारको रुपमा समेत विश्लेषण गरिएको थियो । सलिनले यसपछि फिल्म ‘यात्रा’मा काम गरे । यो  फिल्मले अपेक्षाकृत व्यापार नगरेपछि सलिन केही निराश बने । सलिनमानले यसपछि कुनै पनि नयाँ फिल्म साइन गरेका छैनन् । बरु, उनी आफ्नो दैनिकी अनलाइन भिडियो गेम पब्जी खेलेर बिताइरहेका छन् । 

पब्जी खेल्दै गर्दा उनी आफ्ना फ्यानहरुसँग कुराकानी पनि गर्छन् । अधिकांश फ्यानहरुको चासो उनको नयाँ फिल्म कहिले आउँछ भन्नेमा नै छ । 

सलिमानले पब्जी लाइभमा आफूलाई राम्रो कथाबाट अफर नै नआएको गुनासो गरेका छन् । फ्यानको प्रश्नको जवाफ दिने क्रममा उनले नेपाली फिल्मको कथावस्तु पुरानै शैलीमा अगाडि बढेको भन्दै काम गर्न रहर नलागेको सुनाए । 

सलिनमानले आफ्नो नयाँ फिल्म कहिले आउँछ भन्ने बारेमा आफूलाई पनि केही थाहा नभएको बताएका छन् । सलिनमानले फ्यानलाई आफ्ना २ फिल्म हेरेर नै चित्त वुझाउन समेत आग्रह गरेका छन् । 

‘यात्रा’मा काम गरेपछि सलिनमानलाई अन्य केही चर्चित ब्यानरबाट अफर नगएको पनि होइन । तर, उनले फिल्ममा काम गर्ने मन बनाएनन् । यो बिचमा  सलिनमानको बिहेको चर्चा समेत चल्यो । तर, उनकी प्रेमिका मेकअपको अध्ययनका लागि बिदेश उडेपछि बिहेको सेड्यूल समेत केही बर्ष धकेलिएको छ । सलिनमान भने फिल्ममा काम गर्न भन्दा पनि पब्जी खेल्नमै आफूलाई बढी केन्द्रित गरिरहेका छन् ।