‘छक्का पन्जा ४’को गलत रिपोर्ट दिएको भन्दै भुवनमाथि दीपकको आक्रोश

फिल्म ‘छक्का पन्जा ४’ले रिलिजको डेढ महिनामा करिब १७ करोड ग्रस कलेक्शन गरेको रिपोर्ट चलचित्र विकास बोर्डले सार्वजनिक गरेको छ । विकास बोर्डले बर्षभरि रिलिज भएका स्वदेशी तथा विदेशी फिल्मको बक्स अफिस आँकडा सार्वजनिक गरेको हो । बक्स अफिस आँकडामा ‘छक्का पन्जा ४’को व्यापार करिब १७ करोड नजिक छ । 

तर, यो कुरामा यसका निर्माता तथा कलाकार दीपकराज गिरीलाई चित्त बुझेको छैन । बक्स अफिस सर्भरमा कलेक्शन भएको रिपोर्ट विकास बोर्डले सार्वजनिक गरेको हो । तर, दीपकराज गिरीले भने विकास बोर्डले आफूहरूको फिल्मको गलत रिपोर्ट सार्वजनिक गरेको उल्लेख गरेका छन् । 

उनले विकास बोर्ड अध्यक्षमाथि तल्लो स्तरको भाषा प्रयोग गर्दै लेखेका छन्–‘यो अध्यक्ष आएपछि जताततै लफडै लफडा छ हाम्रो क्षेत्रमा ।’

उनले विकास बोर्डका अध्यक्ष भुवन केसीलाई ‘यो अध्यक्ष’ भन्दै आक्रोश व्यक्त गरेका छन् । फागुनको १९ गतेबाट रिलिज भएको यो फिल्मको व्यापार ‘कबड्डी ४’को भन्दा करिब ४ करोडले कम हो ।