कमाईमा ‘कबड्डी ४’ भन्दा साढे ४ करोडले पछि ‘छक्का पन्जा ४’

यो बर्ष रिलिज भएका ४६ वटा नेपाली फिल्म मध्ये सर्वाधिक धेरै कमाई गर्ने फिल्म ‘कबड्डी ४’ हो । यो फिल्मले नेपाली बक्स अफिसमा मात्र २२ करोड आसपासको कमाई गरेको आँकडा निर्माताले सार्वजनिक गरेका थिए ।

तर, चलचित्र विकास बोर्डले सार्वजनिक गरेको आँकडा अनुसार, यो फिल्मले बक्स अफिसमा ७ लाख ६६ हजार टिकट विक्री गर्दै २१ करोड ३८ लाखको ग्रस कलेक्शन गरेको छ । यो नेपाली बक्स अफिसमा यो वर्षकै सर्वाधिक व्यापारको रेकर्ड हो । 

यो बर्ष रिलिज भएको फिल्म ‘छक्का पन्जा ४’ले बक्स अफिसमा ‘कबड्डी ४’को रेकर्ड तोड्छ या तोड्दै भन्ने चर्चा समेत चलिरहेको थियो । तर, बक्स अफिसमा ‘छक्का पन्जा ४’ ‘कबड्डी ४’को तुलनामा धेरै पछि रहेको देखिन्छ । 

विकास बोर्डले सार्वजनिक गरेको आँकडामा ‘छक्का पन्जा ४’को व्यापार १६ करोड ९४ लाख छ । अर्थात्, फिल्मको लाइफ टाइम व्यापार लगभग १७ करोडमा सकिने निश्चित छ । यसरी हेर्दा ‘छक्का पन्जा ४’ ‘कबड्डी ४’ भन्दा करिब साढे ४ करोडले पछि देखिएको छ ।

यो बर्ष फिल्म ‘छक्का पन्जा ४’ले दर्शकबाट मिश्रित प्रतिक्रिया पायो । जसका कारण, यसको व्यापार निर्माणपक्षले अपेक्षा गरे अनुसार भएन । निर्माता दीपकराज गिरी र उनको टिमले ‘छक्का पन्जा ४’बाट ‘कबड्डी ४’ले बनाएको व्यापारिक रेकर्ड तोडेर नम्बर १ को पोजिशन हासिल गर्ने सोच बनाएको थियो । तर, उनीहरूको यो उद्देश्य यसपटक असफल भएको छ । 

नेपाली बक्स अफिसमा यो बर्ष ‘केजीएफ २’ले सर्वाधिक कमाइको दोस्रो रेकर्ड राखेको छ । यो फिल्मले नेपाली बक्स अफिसमा १९ करोडको ग्रस व्यापार गरेको छ । 

निर्माताहरूले मिडियालाई बक्स अफिसको झुटो आँकडा सार्वजनिक गर्दै आएका छन् । तर, विकास बोर्डले सबै जसो हलमा बक्स अफिस सर्भर जडान गरेपछि भने निर्माताहरूको झुटो आँकडाको पर्दाफास हुन थालेको छ ।