नआउने भयो वैशाख १ मा ‘नाइँ नभन्नू ल ६’

वैशाख १ गतेबाट रिलिजको तयारीमा रहेको फिल्म ‘नाइँ नभन्नु ल ६’ अन्तिम समयमा आएर प्रदर्शनमा नआउने भएको छ । फिल्म रिलिज हुन तीन दिन समय बाँकी रहँदा निर्माण पक्षले आफ्नो तयारी पुरा गर्न नसक्दा फिल्म तोकिएको मितिमा नआउने भएको हो ।

फिल्मको निर्माण टिम रिलिजको समय हिजो सम्म मात्रै फिल्म नै नसकिने हो कि भन्ने तनावमा काम गरिरहेको थियो ।  युट्युबमा सार्वजनिक भएका प्रचार सामाग्रीमा दर्शक र मिडियाबाट प्राप्त भएका आलोचनालाई सुधार गर्दै निर्माण टिमले यसको कलरमा फेरि काम गरेका छन् । सोही काम भ्याउन दबाब रहेको र नसकिएकाले फिल्म तोकिएको मितिमा आउन नसकेको बुझिएको छ ।

निर्देशक विकासराज आचार्यले फिल्मको नयाँ रिलिज मिति चाँडै सार्वजनिक गरिने बताएका छन् । फिल्ममा आँचल शर्मा, आशीर्वाद क्षेत्री, सरोज खनाल, प्रियंका कार्की, केकी अधिकारी र अनुभव रेग्मी लगायतको अभिनय छ ।

फिल्ममा विकासराज आचार्य र विष्णुमणि दाहालको लगानी छ । फिल्मको कथा विकास, सामिप्यराज तिमल्सिना र अरुण देवी जोशीले लेखेका हुन् । फिल्ममा सञ्जय न्यौपाने, रमेश चौधरी र पुरुषोत्तम प्रधान कार्यकारी निर्माता छन् ।

फिल्ममा हिमाल केसीको एक्सन, पुरुषोत्तम प्रधानको छायांकन, सन्देश शाहको सम्पादन, कविराज गहतराज र मनोज विश्वकर्माको कोरियोग्राफी, भूपेन्द्र अधिकारी, वसन्त सापकोटा र शरद शंकरको संगीत रहेको छ ।