प्रदर्शन मिति तोक्दै फिल्म 'कैदीको पत्र'को पहिलो गीत सार्वजनिक

फिल्म 'कैदीको पत्र'को आगामी बैशाख १५ गतेलाई प्रदर्शन मिति तोक्दै पहिलो गीत सार्वजनिक गरिएको छ । 'मेरो दिलको तालमा' बोलको गीतमा प्रताप दास र सुबानी मोक्तानको स्वर रहेको छ भने सनम कुमार बैरागको शब्द रचना तथा सुरेश सेञ्चुरीले संगीत दिएका छन् ।

यस गीतको भिडियोमा फिल्मका प्रमुख कलाकारहरु कुनाल विश्व र ब्रिटिस अभिनेत्री म्याडिशन लाजारसको अभिनय रहेको छ । यस गीतको अंग्रेजी लाइन निखिल गोतामेले लेखेका छन् । कबिराज गहतराजले कोरियोग्राफि गरेका छन् ।

प्रेम र रोमाञ्सको कथामा बनेको यो फिल्ममा आफ्नो जीवनमा पाएको खुशीलाई सम्हाल्न नसक्दा मानिसले ब्यहोर्नुपर्ने उतारचढाव र भोग्नुपर्ने कठिनाईहरु देख्न पाइने निर्देशक सनम कुमार बैरागले बताए । यो फिल्मको सम्पूर्ण छायांकन स्कटल्याण्डमा भएको हो । यसमा कुनाल र म्याडिशनको साथमा सलिना थापामगर, पृथ्वीराज खत्री, सुवर्ण थापा, मनिष श्रेष्ठ लगायतका नेपाली तथा ब्रिटिस कलाकारहरूको अभिनय रहेको छ । दिल घले, नानी बैराग, कैलाश विश्वकर्मा र हिराल जोशी फिल्मका निर्माता हुन् ।

यस फिल्मका डिओपी रामेश्वर कार्की हुन् भने अर्जुन जिसिले सम्पादन र ब्रिटिश कलरिष्ट यासिन एनुचौबीले कलर ग्रेडिङ्ग गरेका छन् ।