के अनमोलसँग ‘माइतीघर २’मा सहकार्य गर्दैछन् रामबाबु गुरुङ ?

निर्देशक राम बाबु गुरुङले निर्माण गरेको फिल्म ‘जारी’ वैशाखको १ गतेबाट रिलिज हुँदैछ । यो फिल्मको रिलिजपछि राम बाबुले नयाँ फिल्म ‘डिग्री माइला’ निर्देशन गर्दैछन् । उसो त राम बाबुले फिल्म ‘कबड्डी ५’ समेत बनाउने तयारी गरेका छन् । 

राम बाबु नयाँ प्रोजेक्टको तयारीमा व्यस्त रहँदा उनले नायक भुवन केसीसँग पनि केही चरणको मिटिङ गरिसकेको बुझिएको छ । श्रोतका अनुसार, राम बाबु र भुवन केसीबीच फिल्म ‘माइतीघर २’मा सहकार्य गर्ने विषयमा कुराकानी अगाडि बढिरहेको छ । 

भुवन केसीले ‘माइतीघर २’ बनाउने चर्चा केही बर्ष अगाडिदेखिको हो । यसका लागि उनले एक भारतीय निर्देशकसँग संझौता पनि गरिसकेका थिए । तर, ती भारतीय निर्देशकको निधन भएपछि भुवनको यो प्रोजेक्ट रोकिएको थियो । श्रोतका अनुसार, यो प्रोजेक्टलाई राम बाबु गुरुङसँग अगाडि बढाउने भुवन केसीको तयारी छ ।

यो फिल्ममा नायक अनमोल केसी फरक गेटअपमा देखिदैछन् । अनमोलले ‘जेरी अन टप’को तयारी गरिरहेको समयमा भुवनले ‘माइतीघर २’को कामलाई पनि अगाडि बढाइरहेका छन् ।

राम बाबुले केही समय अगाडि दिएको एक अन्तवार्तामा अनमोलसँग काम गर्ने विषयमा छलफल चलिरहेको बताएका थिए । उनले, चाँडै नै अनमोलसँग सहकार्य हुने समेत बताएका थिए । 

नेपाली फिल्मका हिट निर्देशक र चर्चित नायकबीच सहकार्य भयो भने त्यसले बक्स अफिसमा पक्कै नयाँ रेकर्ड बनाउने विश्वास गर्न सकिन्छ ।