दुर्गेश थापाको करिअरः सम्हाल्न खोज्छन्, फेरि भत्किन्छ

नायक पल शाहको घटनामा सर्वाधिक धेरै आलोचित र पलका फ्यानको  निशानामा गायक दुर्गेश थापा परे । पलले एक बर्ष अगाडि प्रहरी समक्ष आत्मसर्मपण गर्नु अगाडि दुर्गेशको पनि नाम लिएपछि घटनाले नयाँ मोड लियो । करिब एक बर्ष दुर्गेशले सार्वजनिक रुपमा गीत गाउनै सकेनन् । सामाजिक संजालमा आउने गालीगलौजले उनलाई सधै नै तनावमा राख्यो । 

तर, पलको केशले नयाँ मोड लिएपछि दुर्गेश पनि विस्तारै स्टेजमा देखिन थाले । तर, स्टेजमा देखिदा कहिले ढुंगा प्रहार भएको त कहिले विभिन्न घटना घटेको भन्दै दुर्गेशको चर्चा सामाजिक संजालमा भई नै रह्यो । 

उसो त, दुर्गेश थापालाई कहिले गीतमा रक्सीको प्रचार गरेको भन्दै प्रहरीले पक्राउ पनि गर्यो । कहिले दुर्गेश थापाले अन्तरवार्तामा गीत गाउन नजान्दा, एउटा गायकको भनेर अर्का गायकको गीत गाइदिदा आलोचना खुबै भयो । 

दुर्गेशको सांगीतिक करिअर सधै नै विवादमा रहेको देखिन्छ । उनै, दुर्गेश आफूलाई जब सम्हाल्न खोज्छन्, फेरि उनको करिअरमा केही नै केही समस्या आएको देखिन्छ । पल शाहको केसपछि विस्तारै स्टेजमा फर्किरहेका दुर्गेशले फेरि एक जना टिकटकरमाथि हातपात गरेको भन्दै प्रहरीमा उजुरी नै पर्यो । 

टिकटकर रिदम क्षेत्रीले बनभोजका क्रममा वादविवाद हुँदा दुर्गेशसहित तीन जनाले आफूलाई कुटपिट गरेको भन्दै प्रहरीमा उजुरी दिए । यसपछि फेरि दुर्गेश विवादमा आएका छन् । 
दुर्गेश थापा र विवाद पर्यावाची शब्द जस्तै बनेका छन् । दुर्गेशले आफूलाई कहिलेकाही सम्हाल्न नसक्दा उनको करिअर पनि भत्किरहेको छ ।