‘भष्मे डनः पशुपति प्रसाद २’मा दुर्गा माता स्वस्तिमा

चैत्रको १० गतेबाट पशुपति परिसरमा छायांकन भइरहेको फिल्म ‘पशुपति प्रसाद २ः भष्मे डन’बाट नायिका स्वस्तिमा खड्काको गेटअप बाहिरिएको छ । 

स्वस्तिमा यो फिल्ममा दुर्गा माताको भूमिकामा देखिएकी छिन् । छायांकन सेटबाट बाहिरिएको तस्विरले स्वस्तिमाको भूमिकालाई लिएर दर्शकमा उत्साह र कौतूहलता पैदा हुने  निश्चित छ । स्वस्तिमाले यस अगाडि यस्तो भूमिकामा काम गरेकी थिइनन् । 

फिल्मको छायांकन सेटमा नायक विपिन कार्की र सौगात मल्ल पनि अभिनय गरिरहेका छन् । विपिनलाई दुर्गा माता बनेकी स्वस्तिमा खड्कालाई नमस्कार गर्दै गरेको अवस्थामा देख्न सकिन्छ । 
निर्देशक दीपेन्द्र के खनालले स्वस्तिमाको भूमिका विशेष रहेको बताए । फिल्ममा स्वस्तिमा लाई हेर्दा दर्शकमा छुट्टै उत्साह पैदा हुने दीपेन्द्रको भनाई छ । यो फिल्मलाई आउँदो वर्षको कार्तिक ४ गतेबाट रिलिज गर्ने तयारी छ । 

खगेन्द्र लामिछानेको कथा रहेको यो फिल्मले बक्स अफिसमा बम्पर व्यापार गर्ने अड्कल  लगाइएको छ । निरज कँडेलको छायांकन रहेको फिल्मलाई ३० दिनमा सक्ने प्रोडक्शन डिजाइनर शंकर पाण्डेले जानकारी दिए ।