निर्देशक समाजमा जनकदिप पराजुलीको नेतृत्व

नेपाल चलचित्र निर्देशक समाजको अध्यक्षमा जनकदिप पराजुली निर्विरोध विजयी भएका छन् । समाजको आज भएको निर्वाचनमा सम्पूर्ण कार्यसमिति नै निर्विरोध निर्वाचित भएका छन् । 

समाजको उपाध्यक्षमा सुभाष गजुरेल र दीप शिखा खड्का, महासचिवमा अरुण कुमार प्रधान, कोषाध्यक्षमा समुन्द्र भट्ट, सह–कोषाध्यक्षमा राज बस्न्यात, सदस्यहरूमा दीपक वली, सौरभ चौधरी, अम्बर ओली, सत्य राज चौलागाईं, उत्सव केसी, अमृत मान महर्जन निर्विरोध निर्वाचित भएका छन् । 

यस्तै, सह–सदस्यहरुको भने निर्वाचन भएको थियो । जसमा सीमा गुरुङ र रामकुमार श्रेष्ठ निर्वाचित भएका छन् । 

अध्यक्ष पदमा विजयी भएसँगै जनकदिप पराजुलीले समाजमा देखिएको समस्यालाई मिलाएर लैजाने बताएका छन् । उनले भने–‘विशेषगरि, मेरो कार्यकालमा निर्देशकहरूको क्षमता विकासका लागि नै काम हुनेछ । बलियो संस्था भएर पनि निर्देशक समाज कमजोर जस्तो देखिएको छ । त्यसमा पनि हामीले काम गर्नुपर्नेछ ।’