‘नाई नभन्नु ल ६’ शिर्ष गीतः पुरानै गीत बेचेर चल्ला त फिल्म ?

निर्देशक विकासराज आचार्यको हिट फिल्म ‘नाई नभन्नु ल’को छैटौं सिरिज बैशाखको १ गतेबाट रिलिज हुँदैछ । यो फिल्मको दोश्रो गीत शुक्रबार रिलिज गरियो । फिल्मको शिर्ष गीतको रुपमा सार्वजनिक ‘नाई नभन्नु ल’ यसअघि पनि दर्शकले सुनिसकेका हुन् । 

गायिका मेलिना राईको स्वरमा विकासले ‘नाई नभन्नु ल ५’मै यो गीत प्रयोग गरिसकेका थिए । सो समयमा गीत निकै चर्चित पनि बन्यो । सोही गीतलाई गायक प्रताप दासको स्वरमा ‘नाई नभन्नु ल ६’मा समावेश गरिएको छ । 

गीतको तुलना गर्ने हो भने प्रतापले निकै कमजोर गाएका छन् । मेलिनाको स्वरको अगाडि प्रतापको स्वर निकै नै फिक्का सुनिएको छ । भिडियो पनि पहिलेको तुलानामा यसपटक निकै नै कमजोर छ । 

बसन्त सापकोटाको संगीतमा तयार गीतको भिडियोमा मुख्य कलाकारहरु नायिका आँचल शर्मा र नव–नायक आर्शिवाद क्षेत्रीलाई फिचरिङ गरिएको छ । 

पुरानै गीतलाई बेचेर नयाँ फिल्म चलाउन निर्माणपक्षले खोजेको देखिन्छ । फिल्मको पहिलो गीतले दर्शकको खासै साथ पाएन । यसैले, अब फिल्मको नयाँ गीत र ट्रेलर बुलन्द आउनुपर्छ ।

किनकी, यो मितिमा अन्य ३ फिल्म पनि रिलिज हुँदैछन् । तिनै फिल्मको प्रचार सामाग्रीले ‘नाई नभन्नु ल ६’लाई कडा चुनौती दिइरहेका छन् ।