निर्देशक समाजः चुनावमा रन्किने, अरु बेला थन्किने

नेपाल चलचित्र निर्देशक समाजले आज नयाँ कार्यसमिति चयन गर्दैछ । रक्षा सिंह राणाको नेतृत्वमा ३ बर्ष बिताएको निर्देशक समाजले आज नयाँ कार्यसमिति चयन गर्दै नयाँ दिशा तय गर्ने अपेक्षा गरिएको छ । 

निर्देशक समाजको निर्वाचन अन्य फिल्मसँग सम्बन्धित संघसंस्थाको निर्वाचन जस्तो चर्चामा छैन । उम्मेदवारहरूले उम्मेदवारी घोषणा पनि शुक्रबार बेलुकीदेखि मात्र गरिरहेका छन् । 

यसैले, पनि फिल्म क्षेत्रका लागि निर्देशक समाजको निर्वाचनमा अध्यक्ष पदमा को आउँछ भन्ने विषयले खासै महत्व पाइरहेको छैन । यसको पछाडि, निर्देशक समाजको सुस्तता हो । 

चुनावको समयमा केही दिन खैलबैला हुने निर्देशक समाजमा त्यसपछि भने सुनसान देखिन्छ । चुनावको समयमा जति नै रन्किए भने चुनावपछि भने निर्देशक समाजको नेतृत्व खासै सक्रिय भएको पाइँदैन । 

उसो त रक्षा सिंह राणा अध्यक्ष र जनकदिप पराजुली महासचिव रहेको वर्तमान नेतृत्वले थुप्रै काम गरेको भन्दै सामाजिक संजाल पनि रंग्याएको छ । तर, उनीहरूले काम गरेको भन्दै सार्वजनिक गरेको बुँदालाई मूल्याङ्कन गर्ने हो भने, हाँसो लाग्दो छ । 

त्यस्तो उल्लेखनीय काम नगरेको निर्देशक समाजको नयाँ नेतृत्वले अब भने फिल्म क्षेत्रमा आफूलाई एक बलियो संस्थाको रुपमा अगाडि ल्याउन सकोस्, शुभकामना ।