विज्ञापनमा मजाक बनेपछि करिश्माको प्रतिक्रिया–‘ अब सुधार्ने छु’

नायिका करिश्मा मानन्धरले अभिनय गरेको एक विज्ञापन विगत केही दिनदेखि चर्चामा छ । विशेष गरि, यो विज्ञापनमा करिश्माको संवाद बोल्ने शैलीलाई लिएर व्यापक आलोचना भएको छ । नेपाली फिल्म क्षेत्रमा ४ दशक बिताएकी करिश्माले किन यति कमजोर अभिनय गरिन् भन्ने प्रश्न पनि उठेको छ । 

बुधबार मेरो फिल्मले यो विषयमा प्रश्न उठाएपछि करिश्माले सामाजिक संजालबाट प्रतिक्रिया दिएकी छिन् । उनले, आफ्ना दर्शकलाई कुनै पनि विज्ञापनमा काम गरेर झुक्याउने मनस्थिति आफ्नो कहिले पनि नरहेको उल्लेख गरेकी छिन् । 

साथै, करिश्माले यो विज्ञापनको सुधार हुने समेत प्रतिबद्धता जनाएकी छिन् । साथै, आफ्ना हरेक क्रियाकलापलाई चासोको साथ हेर्ने र सुधार्ने मौका दिने सबैलाई धन्यवाद  समेत दिएकी छिन् । तर, उनले कहिलेकाही हाँस्नु पनि पर्छ भन्दै आलोचना स्विकार गरेकी छिन् । 

करिश्माले विज्ञापन बनाउने क्रममा आफूले अभिनय मात्र गर्ने र यसको  निर्माणमा कुनै पनि हात आफ्नो नहुने उल्लेख गर्दै अब हरेक विज्ञापनमा काम गर्दा आफू पनि संलग्न भएर काम गर्ने बताएकी छिन् ।