आँचललाई स्टार जन्माउने अवसर

झट्ट हेर्दा, नेपाली फिल्म क्षेत्रमा नायकले नायिकालाई स्टार बनाएको देखिन्छ । थुप्रै स्टार नायकहरुसँग पर्दा शेयर गरेपछि केही नायिकाहरु स्टार भएका छन् । तर, केही यस्ता नायिका पनि छन् जसका कारण नायकहरु स्टार बनेका छन् । 

नायिका रेखा थापाको साथले आर्यन सिग्देल, जीवन लुइटेल जस्ता कलाकार स्टार बनेका थिए । नायिका पूजा शर्माको साथ नायक आकाश श्रेष्ठ स्टार बनेका थिए । 

नायिका साम्राज्ञी राज्यलक्ष्मी शाहको साथले नायक सलिनमान बनियाँ, धिरज मगर स्टार बनेका थिए । 

यसैले, बेलाबखत केही नायिकाको साथले नव–नायकहरुको जन्म हुन्छ र उनीहरुको क्रेज चुलिएको पाइन्छ । 

बैशाख १ गतेबाट रिलिज हुन लागेको फिल्म ‘नाई नभन्नु ल ६’बाट नायिका आँचल शर्मालाई पनि आर्शिवाद क्षेत्रीलाई स्टार बनाउने अवसर छ । यदि, यो फिल्म चल्यो र आर्शिवादको क्रेज चुलियो भने त्यसको केही हदसम्म क्रेडिट नायिका आँचललाई पनि जानेछ । 

यसैले, फिल्मको प्रचारदेखि मिडिया अन्तरक्रियामा आँचलले आर्शिवादलाई कसरी साथ दिन्छिन्, त्यसले ठूलो अर्थ र महत्व राख्दछ । 
विकासराज आचार्य निर्देशित यो फिल्मको पहिलो गीत र टिजर सार्वजनिक भैसकेको छ । गीत र टिजरबाटै आर्शिवादले संभावना भने देखाइसकेका छन् ।