रेखासँग काम गर्न पाउँदा उत्साहित पूजा

नायिका पूजा शर्माले अर्की नायिका रेखा थापासँग सहकार्य गर्न पाउँदा आफू  उत्साहित भएको बताएकी छिन् । 

ज्ञानेन्द्र देउजाको निर्देशनमा बन्न लागेको नयाँ फिल्ममा रेखा र पूजाले एकसाथ काम गर्दैछन् । फिल्मका लागि पूजाले सोमबार कागजी संझौता गरेकी छिन् । फिल्ममा नायिका आँचल शर्माको पनि मुख्य भूमिका रहनेछ । 

रेखा थापालाई आफूले सानैबाट पर्दामा हेर्दै आएको र उनको कामबाट प्रभावित भएको पूजाको भनाई छ । आफ्नी मनपर्ने नायिकासँग पर्दा शेयर गर्न पाउँदा कही कतै सपना जस्तै लागेको पनि उनको तर्क छ । 

यस्तै, पूजाले निर्देशक देउजाको व्यक्तित्वबाट पनि आफू प्रभावित भएको उल्लेख गरेकी छिन् । 
पूजाले दर्शकका लागि यसपटक यो फिल्म विशेष हुने  समेत बताएकी छिन् । फिल्मको छायांकन चैत्र महिनाबाट सुरु गर्ने योजनामा निर्देशक देउजा छन् । रेखा, पूजा र आँचलले पहिलो पटक पर्दा शेयर गर्न लागेका हुन् ।