‘छक्का पन्जा’ टिमको साथले केकी र बेनिशाको भागमा पहिलो हिट फिल्म

नेपाली फिल्म क्षेत्रका २ नायिका केकी अधिकारी र बेनिशा हमालले एउटै फिल्मबाट यो क्षेत्रमा डेब्यू गरेका थिए । यी दुबै नायिकाले फिल्म ‘स्वर’बाट डेब्यू गरेका हुन् । 

यसपछि, यी दुई नायिकाको करिअर आफ्नै तरिकाले काम गरिरहेका छन् । करिअरको कुरा गर्नुपर्दा बेनिशा भन्दा केकी धेरै अगाडि छिन् । तर, यी दुबै नायिकाले करिअरमा हिट फिल्म दिन नसकेर छटपटिनु परेको थियो । 

तर, केकी अधिकारीलाई निर्माता तथा कलाकार दीपकराज गिरीले फिल्म ‘छ माया छपक्कै’मा अभिनय गराए । केकीको करिअरको पहिलो हिट फिल्म नै ‘छ माया छपक्कै’ बन्न पुग्यो ।

केकीले यसअघि दुई दर्जन फिल्ममा अभिनय गरेपनि हिट फिल्मको स्वाद लिन पाएकी थिइनन् । यसपछि, केकीले अभिनय गरेको अर्को फिल्म ‘झिँगे दाउ’ पनि बक्स अफिसमा हिट भयो । 

हिट फिल्मको पर्खाइमा रहेकी नायिका बेनिशा हमाललाई पनि उनै दीपक र उनको टिमले ‘छक्का पन्जा ४’मा अभिनय गरायो । यो  फिल्म गत शुक्रबारदेखि रिलिज भैरहेको छ । फिल्मले सुपरहिटको व्यापार गरिसकेको छ । 

बेनिशाले पनि करिअरको पहिलो हिट फिल्मको स्वाद लिन पाएकी छिन् । ‘स्वर’ डेब्यू नायिकाहरुलाई दीपक र उनको टिमले नै पहिलो ब्लकबस्टर फिल्मको स्वाद दिलाएको छ ।