मलिनाका लागि ‘छक्का पन्जा ४’ : हात्ती आयो हात्ती आयो फुस्स

नायिका बेनिशा हमालसँगै अर्की नायिका मलिना जोशीले फिल्म ‘छक्का पन्जा ४’ साइन गर्दा धेरैलाई लागेको थियो, यी पूर्व मिस नेपालले केही सोचेरै यो फिल्ममा काम गर्ने निर्णय गरेकी हुन् ।

किनकी, फिल्मकी सेकेन्ड नायिकाको रुपमा काम गर्नु आफैमा सानो कुरा होइन । त्यसमाथि, बक्स अफिसमा दबदबा कायम गर्ने पक्का जस्तै भएको फिल्मलाई मलिनाले रोज्दा धेरैले उनको करिअरको माइल स्टोनको रुपमा लिएका थिए । 

तर, यो फिल्म हेरेर फर्किएका अधिकांश दर्शकले उनलाई खासै नोटिस गर्दैनन् । किनकी, फिल्ममा मलिनाको भूमिका न त सशक्त छ, न त लामो नै छ । फिल्मको दोश्रो हाफमा देखिने मलिनाको भूमिकाको ठाउँमा अरु कुनै कलाकार राखिएको भएपनि खासै फरक पर्दैनथ्यो ।

केही फिल्ममा मुख्य नायिकाको रुपमा देखिएकी मलिना यो फिल्ममा एक छोरीको आमाको भूमिकामा छिन् । प्रहरी अफिसर्सको भूमिकामा देखिएकी मलिनालाई दर्शकले खासै नोटिस पनि गर्दैनन् । 

मलिनाले यो फिल्म किन साइन गरिन् यो उनले नै जान्ने कुरा हो । तर, हिट फिल्म दिन नसकेर करिअर नै धरापमा परेको समयमा मलिनाका लागि ‘छक्का पन्जा ४’ बलियो हतियार हुन सक्थ्यो । तर, यो अवसर पनि उनले गुमाएकी छिन् ।