लोक गायक राजेन्द्र लम्सालको निधन

चर्चित लोक गायक राजेन्द्र लम्सालको निधन भएको छ ।

लामो समयदेखि युरोपमा बस्दै आएका लम्सालको ६० बर्षको उमेरमा गएराती (सोमबार) निधन भएको पारिवारिक श्रोतले जानकारी दिएको छ । राजेन्द्र अहिलेका लोकप्रिय मोडल सागर लम्साल (बले) को पिता हुन् । राजेन्द्रका सागर सहित ३ छोरा र १ छोरी छन् ।

राजेन्द्र लोक क्षेत्रका पुराना गायक हुन् । उनले गाएका दर्जनौं गीत लोकप्रिय छन् । लम्सालका ‘जापान टोकियो’ सहित ‘डोरीको तीन फुदा’,‘निलो पछ्यौरी’,‘वालिङ फिरफिरे’,‘भीरको टुनी हो’, ‘शिरमा रिबन सलको पछ्यौरी’, ’आमा तिम्रो दूधको भारा’, ‘राइनासकोटको भीर’, ‘मर्स्याङ्दीको पुल’ हिट गीत हुन् ।

स्व. राजेन्द्रलाई सामाजिक सञ्जालबाट विभिन्न कलाकर्मिले श्रद्धाञ्जली दिइरहेका छन् । अन्तिम सँस्कारको लागि उनको पार्थिव शरीरलाई स्पेनबाट नेपाल ल्याइने बताइएको छ ।