वैशाख १ गते पाँच पक्षीय भिडन्त, 'नाइँ नभन्नु ल ६’ पनि थपियो

वैशाख १ गते पनि बक्स अफिसमा ‘हेभिवेट’ फिल्महरूको भिडन्त हुने पक्का भएको छ।

नयाँ वर्षको छेकोलाई प्रदर्शन मितिको रूपमा घोषणा गर्दै 'नाइँ नभन्नु ल ६’ले रिलिज हुने मिति तय गरेको छ ।

विकासराज आचार्य निर्देशित फिल्म 'नाइँ नभन्नु ल ६’को मंगलबार पोस्टर सार्वजनिक गर्दै प्रदर्शन मितिबारे जानकारी दिइएको हो । यसअघि नै वैशाख १ गतेलाई जारी, बुलाकी, प्रसाद-२ र बिहे पासले प्रदर्शन मिति तोकिसकेका छन्। नयाँ वर्षको पहिलो दिनलाई एकैसाथ प्रदर्शन मिति घोषणा गरेपछि पाँच पक्षीय भिडन्त हुने निश्चित भएको छ ।

निर्देशक तथा निर्माता आचार्यले पोस्टर सार्वजनिक पछि भने, ‘हामी १ गते आउने निधो भएको छ । हामी स्वस्थ प्रतिस्पर्धा गर्न चाहन्छौं । आफूले पहिले नै प्रदर्शन मिति घोषणा गरेकाले पछि हट्दैनौ’ ।

निर्देशक आचार्यसहित सामीप्यराज तिमिल्सिना र अरुणदेव जोशीको पटकथा लेखन सहकार्य रहेको फिल्ममा आँचल शर्मा, आशीर्वाद क्षेत्री, प्रियंका कार्की र केकी अधिकारी छन् ।

आख्यान फिल्म्सको ब्यानरमा निर्माण भएको यो फिल्मको विकासराज आचार्य र विष्णुमणि दाहाल निर्माता हुन्, भने कार्यकारी निर्मातामा सञ्जय न्यौपाने, रमेश चौधरी, पुरुषोत्तम प्रधान रहेका छन् ।