निशान र अस्मिताको ‘मेसो मिलाएर’मा राजसँग श्रद्धाको प्रेम

संगीतकार अर्जुन पोखरेल प्रेमिला गीत तयार पार्न माहिर छन् । उनले, संगीत भरिएका प्रेम भाव मिसिएका गीतले बजारमा चर्चा पनि पाएका छन् । 

उनै, अर्जुनको संगीतमा ‘मेसो मिलाएर’ बोलको गीत आज सार्वजनिक गरिएको छ । निशान भट्टराई र अस्मिता अधिकारीको स्वरमा समावेश यो गीतमा दिग्गज धौरालीको शब्द छ । 

गीतले यूवायूवतीबिचको प्रेमील वार्तालापलाई प्रस्तुत गरेको छ । यो गीतको भिडियोलाई माइकल चन्दले निर्देशन गरेका हुन् । माइकलले भिडियोलाई गीतको भाव अनुसार नै तयार पारेका छन् । 

भिडियोमा नायक राज कटुवाल र नायिका श्रद्धा क्षेत्रीको प्रेम र रोमान्स हेर्न सकिन्छ । आकर्षक लोकेशनमा माइकलले भिडियोलाई रंगीन बनाएका छन् । भिडियोमा राज र श्रद्धाको जोडी पनि गज्जबको सुहाएको छ । राज नयाँ फिल्म ‘राजा’को तयारीमा छन् भने श्रद्धाले अभिनय गरेको फिल्म ‘कृष्णलीला’ भदौमा रिलिज भएको थियो । 

उत्सव दाहालको छायांकन रहेको भिडियोलाई शिलन लम्सालले सम्पादन गरेका हुन् । भिडियोमा बेगबहादुर क्षेत्री, सुन्दर कार्की र दीपा थापा कार्कीको पनि अभिनय छ ।