प्रियंकालाई सासु आमाको मात्र साथ

नायिका प्रियंका कार्की अभिनित फिल्म ‘फूलबारी’ शुक्रबारदेखि देशभर रिलिज भैरहेको छ । यो फिल्मले सुखद व्यापार गरिरहेको छ । मंगलबारसम्म बिदाको फाइदा उठाएको  फिल्मको वास्तविक परिक्षा भने आजबाट सुरु हुनेछ । तर, यो फिल्म चल्दा नायिका प्रियंका कार्कीलाई भने फाइदा भएको छ । यो बर्ष २ वटा असफल फिल्मका कारण केही समस्यामा परेकी प्रियंकालाई रामबाबु गुरुङ निर्देशित फिल्मले राहत भने दिएको छ । 

यो फिल्मको प्रिमियरमा प्रियंकाका नजिक भनिएका कोही पनि कलाकार देखिएनन् । यही फिल्मको टिमले मंगलबार बेलुकी फिल्मको विशेष शो पनि आयोजना गरेको थियो । तर, विशेष शोमा पनि प्रियंकालाई साथ दिन उनका नजिकका साथीहरु कोही पनि पुगेनन् । प्रियंका कार्कीकी सासु रविना देशराज भने फिल्म हेर्न पुगेकी थिइन् । 

फिल्म हेरेपछि रविनाले कथावस्तुले छोएको बताइन् । साथै, उनले आफ्नी बुहारीको तारिफ समेत गरिन् । 

प्रियंका र रविनाविच पारिवारिक कुरा समेत मिडियाको अगाडि खुबै चलेको थियो । कार्यक्रममा फिल्म क्षेत्रका अन्य थुप्रै नायिकाहरुलाई पनि बोलाइएको थियो । तर, प्रियंकालाई साथ दिन उनकी सासु आमा मात्र पुगेकी थिइन् ।