साहरुखको ‘पठान’ ले कमायो एक हजार करोड

अभिनेता साहरुख खानलाई जनवरी २४ सम्म ३ सय करोडको एउटा पनि फिल्म दिन नसकेको आरोप लाग्ने गर्दथ्यो । तर, जनवरी २५ बाट साहरुखको क्रेज र स्टारडम नै नयाँ तहमा पुगेको छ ।

उनले अभिनय गरेको फिल्म ‘पठान’ले विश्व बजारबाट १ हजार करोड ग्रस कमाई गरेको छ । योसँगै एक हजार क्लबमा प्रवेश गर्ने यो दोश्रो बलिउड फिल्म बनेको छ । यस्तै, चीनमा रिलिज नै नभई १ हजार करोड कमाउने यो पहिलो बलिउड फिल्म समेत बनेको छ । यसअघि फिल्म ‘दंगल’ले चीनमा बम्पर कमाई गर्दै २ हजार करोडको आँकडा पार गरेको थियो । 

यो फिल्मले विश्व बजारमा १ हजार करोड ग्रस कलेक्शन गर्दै गर्दा भारतीय बक्स अफिसमा पनि ५ सय करोड नेट कलेक्शन पार गरिसकेको छ । यस्तै, हिन्दी भाषामा मात्र ५ सय करोडको क्लबमा प्रवेश गर्ने यो दोश्रो फिल्म बनेको छ । यसअघि हिन्दी भाषामा ‘बाहुबली २’ले ५ सय १० करोडको कमाई गरेको थियो । 

साहरुख खान, दीपिका पादुकोण, जोन अब्राहिम अभिनित यो फिल्मले हिन्दी भाषामा मात्र ‘बाहुबली २’को रेकर्डलाई केही दिनमा नै पार गर्ने पक्का छ ।