बैशाख १ मा नेपालसँगै अष्ट्रेलियामा प्रदर्शन हुँदै ‘प्रसाद २’

हिट फिल्म ‘प्रसाद’को सिक्वेल भएका कारण पनि फिल्म ‘प्रसाद २’ चर्चामा छ । यसमाथि, यसपटक कलाकार पनि हेरफेर भएपछि दर्शकलाई फिल्म कस्तो बनेको होला भन्ने चासो पनि छ । 

यसैबिच, यो फिल्मको अष्ट्रेलिया राइट्स बिक्री भएको छ । गोर्खे इन्टरटेन्मेन्टका रन्जित राज वन्त र नमस्ते इन्टरटेन्मेन्ट अष्ट्रेलियाका संचालक देव कार्कीले यो फिल्मको अष्ट्रेलिया प्रदर्शनको अधिकार खरिद गरेका छन् । फिल्मका प्रस्तुतकर्ता सुभाष थापा र रन्जितराजविच कागजी संझौता सम्पन्न भएको छ । 

अब, प्रस्तुतकर्ता थापाका अनुसार यो फिल्म नेपालसँगै अष्ट्रेलियामा बैशाख १ गते नै रिलिज हुनेछ । ‘प्रसाद’ले अष्ट्रेलियामा राम्रो व्यापार गरेपछि वन्तले यसको सिक्वेलको अधिकार पनि खरिद गरेका हुन् । 

सुदर्शन थापाको निर्देशनमा तयार भएको यो फिल्ममा विपिन कार्की, केकी अधिकारी, अर्पण थापा, महेश त्रिपाठी, प्रकाश घिमिरे, विशाल पहाडी, कमलमणी नेपाल, निमा पाण्डे लगायतका कलाकारले अभिनय गरेका छन् । सुशिल पौडेलको लेखन रहेको यो फिल्ममा सुदर्शन बस्नेतको लगानी छ । 

फिल्ममा राजनराज सिवाकोटीको संगीत, राजेश श्रेष्ठको छायांकन छ । फिल्मलाई उत्कृष्ट बनाउन कुनै कसर बाँकी नराखेको निर्देशक थापा बताउँछन् ।