एक साताको अन्तरमा सुरक्षाका २ फिल्म

फिल्म रिलिजका लागि तछाडमछाड गर्ने नेपाली फिल्मका मेकरले कलाकारको अवस्था भने हेर्दैनन् । कलाकारलाई पनि आफ्नो फिल्म केही महिनाको अन्तरमा रिलिज भैदिए हुन्थ्यो भन्ने लाग्छ । तर, मेकर भने आफूखुसी फिल्मको रिलिज मिति तोकिदिन्छन् । जसले गर्दा, कलाकारलाई एउटै समयमा फिल्मको प्रचार गर्नुपर्ने वाध्यता आइलाग्छ । यसले, दर्शकमा समेत कलाकारको कुन फिल्म रिलिज हुन लागेको हो भन्ने दोधार उत्पन्न हुन्छ । 

चैत्रको २४ गते नायिका सुरक्षा पन्त अभिनित फिल्म 'जिज्ञासा, विचार अनि यथार्थको कथा' ‘बहाब’ रिलिज हुँदैछ । यो फिल्मको केन्द्रमा सुरक्षा नै छिन् । फिल्मको फस्टलुक सार्वजनिक भएसँगै यसले चर्चा पनि खुबै पाइरहेको छ । फिल्मको फस्टलुकमा सुरक्षा एउटा पीजडामा थुनिएको सुँगासँगै देखिएकी छिन् । फिल्मले सांकेतिक रुपमा केही नयाँ कुरा भन्न लागेको अनुभुती हुन्छ । 

तर, यो फिल्म रिलिज भएको एक सातामै उनै सुरक्षाको अर्को फिल्म बुलाकी पनि रिलिज हुँदैछ । यो फिल्ममा सुरक्षा डोल्पाको एक महिलाको भूमिकामा छिन् । जहाँ, सन्तान नभएपछि महिलाले भोग्नुपर्ने विभिन्न आरोह र अवरोहलाई देखाइएको छ । फिल्मको टिजरलाई दर्शकले मन पराइसकेका छन् । 

तर, एक साताको अन्तरमा २ फिल्म रिलिज हुँदा सुरक्षालाई एकसाथ २ फिल्मको प्रचार गर्नुपर्ने दबाब छ । अर्कोतिर, सुरक्षाको कुन फिल्म रिलिज हुन लागेको हो भन्ने दोधार समेत दर्शकलाई पर्न सक्छ । यो बिषयमा दुबै फिल्मका निर्माताले ध्यान पुर्याएको भए निकै राम्रो हुने थियो कि ?